Փաստ ինֆո

ՀՀ հանրային ծառայությունները կարգավորող հանձնաժողովի նախկին անդամ Շիրազ Կիրակոսյանը որևէ կերպ չի կարող գտնվել նախնական կալանքի տակ, քանի որ հոդվածի վրա տարածվում է համաներում։ Այս մասին «Փաստինֆո»-ի հետ զրույցում ասաց պաշտպան Ինեսսա Պետրոսյանը։

Նշենք, որ Շիրազ Կիրակոսյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով՝ պաշտոնեական լիազորությունները չարաշահելու համար, որն առաջացրել է ծանր հետևանքներ։ Սահմանված արարքը պատժվում է ազատազրկմամբ՝ երկուսից վեց տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով, մինչդեռ, Էրեբունի-Երևանի հիմնադրման 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ ԱԺ-ի կողմից 2018 թվականին հայտարարված համաներումը կիրառվում է 60 տարին լրացած անձանց նկատմամբ, ովքեր մեղադրվել կամ մեղադրվում են այնպիսի հանցագործություն կատարելու մեջ, որոնց համար նախատեսված է պատիժ` ոչ ավելի, քան վեց տարի ժամկետով ազատազրկում։

Այլ կերպ ասած՝ մեղսագրվող հոդվածով դատարանի կողմից չի կարող անազատության տեսքով պատիժ նշանակվել, սակայն Կիրակոսյանին պահանջել է կալանավորել ոչ միայն ՀՔԾ-ն՝ դատարան ներկայացնելով համապատասխան միջնորդություն, այլև ՀՀ դատախազությունը՝ բողոքարկելով Կիրակոսյանի նկատմամբ կալանավորումը որպես խափանման միջոց ընտրելու միջնորդությունը մերժելու մասին դատարանի որոշումը։

Ինչպես ավելի վաղ հայտնել ենք՝ դատարանը ոչ իրավաչափ էր ճանաչել Կիրակոսյանին ձերբակալելու մասին որոշումը՝ բավարարելով պաշտպանների բողոքը, միևնույն ժամանակ դատարանը մերժել էր կալանավորման միջնորդությունը։ Թեև դատարանի որոշմամբ Կիրակոսյանը չէր կալանավորվել, դատարանի որոշման դեմ վերաքննիչ բողոք է ներկայացրել ոչ միայն դատախազությունը, այլև՝ պաշտպանական կողմը՝ վիճարկելով որոշակի ձևակերպումներ։ Վերաքննիչ բողոքները մակագրվել են դատավոր Արմեն Բեկթաշյանին։

Պաշտպան Ինեսսա Պետրոսյանը «Փաստինֆո»-ի հետ զրույցում ասաց, որ Վերաքննիչ դատարանում արդեն քննության են առնվել պաշտպանական կողմի և մեղադրող կողմի բողոքները, ըստ էության քննարկվել են դրանք։ Պաշտպանական կողմը պնդել է- որ հիմնավոր կասկածը միանշանակ բացակայում է, իսկ հիմքերի մասին ընդհանրապես խոսք չկա, 66-ամյա Շիրազ Կիրակոսյանին կալանավորելու որևէ հիմք չկա։ Անդրադառնալով դատախազության կողմից ներկայացրած վերաքննիչ բողոքին՝ փաստաբանը նշեց, որ հոդվածի վրա համաներում է կիրառվում և որևէ նշանակություն չունի, եթե լինում է քաղաքացիական հայց, այսինքն՝ դա լուծվում է քաղաքացիական դատավարության կարգով, պատժի կրման հետ կապ չունի և այս պայմաններում դատախազությունը բողոքարկել է դատական ակտը։ Նրա փոխանցմամբ՝ բողոքի քննությունը գտնվում է վերջնական փուլում, հաջորդ դատական նիստը նշանակվել է սեպտեմբերի 22-ին։

Ինչ վերաբերում է նրա մասնակցությամբ քննչական գործողություններին, փաստաբանը հայտնեց, որ մեկ անգամ են հրավիրվել ՀՔԾ, նոր քննչական խմբի որոշում է եղել, պաշտպանական կողմը ծանոթացել է և որևէ այլ քննչական գործողության համար չեն հրավիրվել, իսկ Շիրազ Կիրակոսյանը պատրաստակամ է մասնակցել յուրաքանչյուր քննչական գործողության, որը կնախաձեռնի վարույթն իրականացնող մարմինը։

Ավելի վաղ տեղեկացրել ենք, որ քրեական գործով ՀՀ հանրային ծառայությունները կարգավորող հանձնաժողովի նախկին նախագահ Ռոբերտ Նազարյանին և ՀՀ հանրային ծառայությունները կարգավորող հանձնաժողովի նախկին անդամներ Շիրազ Կիրակոսյանին և Մուշեղ Կոշեցյանին, հանձնաժողովի նախագահի տեղակալ Նիկոլայ Գրիգորյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով՝ պաշտոնեական լիազորությունները չարաշահելու համար, որն առաջացրել է ծանր հետևանքներ։ Ըստ ՀՔԾ հաղորդագրության՝ քրեական գործի նախաքննության ընթացքում բավարար ապացույցներ են ձեռք բերվել, որ Ռոբերտ Նազարյանի և հանձնաժողովի վերը նշված անդամների գործողությունների պատճառով «Ձորագետ Հիդրո» ՍՊ ընկերության հիդրոէլեկտրակայանից արտադրված և առաքված էլեկտրական էներգիայի վաճառքի համար 2012-2019 թվականների ընթացքում սահմանվելիք սակագների փոխարեն նույն ժամանակահատվածների համար սահմանվել են կրկնակին գերազանցող սակագներ, որի հետևանքով «Ձորագետ Հիդրո» ՍՊ ընկերության կողմից ՀՀ-ում էլեկտրաէներգիա սպառող ֆիզիկական և իրավաբանական անձանցից հավելյալ ստացվել է առանձնապես խոշոր չափերի՝ 7,052,065,099 ՀՀ դրամ գումար:

Հեղինակ՝ Իզաբել Սահակյան

Աղբյուր` Փաստինֆո