Փաստ ինֆո

Երևանի ընդհանուր իրավասության դատարանում՝ դատավոր Տաթևիկ Ստեփանյանի նախագահությամբ, մեկնարկել է ՀԱՊԿ նախկին քարտուղար, ՀՀ ԶՈՒ ԳՇ նախկին պետ Յուրի Խաչատուրովն ընդդեմ քաղաքագետ Ստեփան Գրիգորյանի գործով դատական նիստը։

«Փաստինֆո»-ի հաղորդմամբ՝ դատարանը քննարկում է ապացուցման առարկան և ապացուցման բեռի բաշխման հարցերը։ Խաչատուրովի ներկայացուցիչ Անահիտ Սարգսյանը նշեց, որ հայցվոր կողմը պետք է ապացուցի, որ արտահայտությունները վերաբերում են Յուրի Խաչատուրովին և որ ունեցել են արատավորող բնույթ, իսկ պատասխանող կողմը պետք է ապացուցի, որ Ստեփան Գրիգորյանի արտահայտություններն ունեցել են գնահատողական բնույթ և, որ մինչև արտահայտություններ կատարելն իրականացվել են մի շարք ուսումնասիրություններ։ Պատասխանող կողմի ներկայացուցիչն էլ առաջարկեց, որ հայցվոր կողմը պետք է ապացուցի, որ Գրիգորյանի արտահայտությունները միտված են եղել Յուրի Խաչատուրովին արատավորելուն։ Բացի դա՝ վերջինս նշեց, որ Գրիգորյանի հայտարարությունն ունեցել է մտահոգության արտահայտման բնույթ և պնդեց, որ ըստ հայցվոր կողմի՝ պատասխանողը խախտել է հայցվորի մասնավոր կյանքի անձեռնմխելիության իրավունքը՝ սեփական իրավունքը իրացնելիս, մինչդեռ, փաստաբանը կարևորեց խոսքի ազատության իրավունքը։

Պատասխանող կողմը գտնում է, որ հայցվոր կողմը պետք է ապացուցի թեզերը, մասնավորապես՝ խոսքի և ազատության իրավունքի սահմանափակումը երաշխավորվում է օրենքով և խոսքի նման միջամտությունը հետապնդում է իրավաչափ նպատակ և նման սահմանափակումը համաչափ է արդյունքում հետապնդվող նպատակին, այսինքն՝ Խաչատուրովի իրավունքների պաշտպանությանը։ Ինչ վերաբերում է պատասխանող կողմի ապացուցման բեռին, պատասխանող կողմի ներկայացուցիչը հայտնեց, որ պետք է պատասխանող կողմի վրա դրվի որոշակի փաստեր ներկայացնելու բեռը, այսինքն՝ ոչ թե հայտարարության ճշմարտացիության լինելու բեռը։

Նշենք, որ հայցադիմումը ներկայացվել դեռևս երկու տարի առաջ, սակայն առ այսօր գործը դատաքննության փուլ չի հասել։ Նախորդ դատական նիստերը պարբերաբար հետաձգվել են՝ տարբեր պատճառաբանություններով և այսօր միայն դատարանը որոշեց ապացուցման բեռի հարցը. Ըստ այդմ՝ հայցվոր կողմը պետք է ապացուցի, որ ներկայացվել են փաստացի տվյալներ, որոնք պարունակել են որոշակի գործողությունների վերաբերյալ տվյալներ և չեն եղել վերացական, հայտարարությունը եղել է հրապարակային և իրականում արատավորել են պատիվն ու արժանապատվությունը, իսկ պատասխանող կողմը պետք է ապացուցի, որ հայտարարությունները ճշմարիտ են եղել։ Բացի դա՝ հայցվոր կողմի ներկայացուցիչը հայտնեց, որ որպես հերքում անհրաժեշտ է համարում, որ վերջինս հրապարակի տեսանյութը և հերքի ավելի վաղ հնչեցրած հայտարարությունները։ Փաստաբանը ուշադրություն հրավիրեց նաև տեսանյութի տարածմանը և դիտումներին։

Հիշեցնենք, որ ՀԱՊԿ նախկին քարտուղար, ՀՀ ԶՈՒ ԳՇ նախկին պետ Յուրի Խաչատուրովը քաղաքագետ Ստեփան Գրիգորյանի դեմ հայցադիմում է ներկայացրել՝ պահանջելով հերքել զրպարտություն հանդիսացող տվյալները և 2 մլն դրամի չափով փոխհատուցում։

Հայցադիմումի պատճառ է դարձել 2018թ մայիսի 30-ին Գրիգորյանի կողմից հարցազրույցներից մեկում արված հայտարարությունները, որով, ըստ Խաչատուրովի Գրիգորյանն արատավորել է իր պատիվն ու արժանապատվությունը։ Նշենք, որ Գրիգորյանի հայտարարությունը վերաբերում է 2016թ Ապրիլյան պատերազմի ընթացքում Յուրի Խաչատուրովի գործողություններին։

Հեղինակ՝ Իզաբել Սահակյան

Աղբյուր` Փաստինֆո