Փաստ ինֆո

Երևանի ընդհանուր իրավասության դատարանում՝ դատավոր Դավիթ Հարությունյանի նախագահությամբ, այսօր կայացել է «Ռեստարտի» անդամներ Դավիթ Պետրոսյանի և մյուսների գործով դատական նիստը։ Նշենք, որ խոսքը գնում է Նարեկ Մալյանի ենթադրյալ առևանգման և աղբարկղը նետելու փորձի վերաբերյալ քրեական գործի մասին։
Գործը գտնվում է դատաքննության՝ ապացույցների հետազոտման փուլում, մասնավորապես, այս դատական նիստին դատարանը հետազոտել է գործում առկա տեսաձայնագրությունները, որն ընթացել է լարված մթնոլորտում. Դավիթ Պետրոսյանը դատարանի դահլիճից հեռացվել է։ Պաշտպան Ինեսսա Պետրոսյանը «Փաստինֆո»-ի հետ զրույցում պատմեց, որ պաշտպանական կողմը միջնորդել էր հետազոտել դեռեւս նախաքննության փուլում ներկայացված տեսանյութերը՝ գործով տուժող Նարեկ Մալյանի՝ 2019 թվականի մարտի ֆեյսբուքյան ուղիղ եթերները, որոնց ընթացքում հնչել են նաեւ հայհոյանքներ։

Մեղադրյալները՝ Դավիթ Պետրոսյանը և մյուսները պնդում են, որ իրենց ակցիան կապված է եղել այն հանգամանքի հետ, որ Նարեկ Մալյանն իրեն թույլ է տվել սեռական բնույթի հայհոյանքներ և, թեև այդ տեսանյութերը տհաճ են, այդուհանդերձ, պաշտպանը գտնում է, որ դրանք գործի նյութեր են և անհրաժեշտ էր հետազոտել։ Մինչդեռ դատախազը հայտարարել է, որ բոլորն էլ ծանոթ են տեսանյութերին՝ վիրավորական արտահայտություններ պարունակող են։ Դատախազի այս դիրքորոշմանն արձագանքել է Դավիթ Պետրոսյանը, ինչից հետո դատարանը հեռացրել է նրան նիստերի դահլիճից։ Փաստաբան Ինեսսա Պետրոսյանն ստեղծված իրավիճակը հենց դատական նիստերի դահլիճում որակել է որպես սադրանք դատախազի կողմից, թեև դատախազը հերքել է դա։ Պետրոսյանը նշեց, որ թեման նուրբ է և ստեղծվեց իրավիճակ, որ դատարանը նման որոշում է կայացրել։

Հաջորդ դատական նիստը նշանակվել է նոյեմբերի 4-ին։ Նշենք, որ հաջորդ դատական նիստին կքննարկվի Պետրոսյանի նկատմամբ դատական սանկցիա կիրառելու հարցը, ինչպես նաև՝ պաշտպանական կողմը, ամենայն հավանականությամբ, կմիջնորդի վերադարձնել Պետրոսյանին դատական նիստերի դահլիճ։ Ըստ ապացույցների հետազոտման սահմանված հաջորդականության՝ կհարցաքննվի գործով տուժողը։

Ավելի վաղ հայտնել ենք, որ քրեական գործով մեղադրյալի կարգավիճակում են «Ռեստարտ» նախաձեռնության անդամներ Դավիթ Պետրոսյանը, Հրաչ Խլղաթյանը, Յուրի Ավագյանը, Գարիկ Միսկարյանը, Դավիթ Սիմոնյանը, Արամայիս Պետրոսյանը։ Նրանց մեղադրանք է առաջադրվել ՀՀ քրեական օրենսգրքի 34-131-րդ հոդվածի 2-րդ մասի 1-ին կետով, այսինքն՝ միմյանց հետ նախնական համաձայնության գալով, բացահայտ կերպով խմբակային առևանգում կատարելու փորձի հատկանիշներով։ Քրեական գործով Նարեկ Մալյանը ճանաչվել է տուժող։

Հիշեցնենք, որ 2019թ մարտի 4-ի գիշերը Նարեկ Մալյանը ֆեյսբուքյան իր էջում գրել էր, որ «Ռեստարտ»-ի անդամների կողմից ենթարկվել է հարձակման։ «Ռեստարտ»-ի անդամները նշել էին, որ իր ֆեյսբուքյան ուղիղ եթերներում Մալյանը մշտապես վիրավորանքներ էր հնչեցնում իրենց հասցեին: Անդամներից Դավիթ Պետրոսյանի խոսքով՝ ի պատասխան հնչեցրած վիրավորանքների՝ փորձել են Մալյանին գցել աղբամանը, ապա՝ տարածել նաև միջադեպի վերաբերյալ տեսագրությունը։

Հեղինակ՝ Իզաբել Սահակյան

Աղբյուր` Փաստինֆո