Փաստ ինֆո

«Արդեն որերորդ անգամն է՝ տեսանյութ է տարածվում, որ ոստիկանները բռնի ուժով քաղաքացիներին, որոշ դեպքերում կանանց, լացացնելով բերման են ենթարկում ոստիկանության բաժանմունքներ ու ասում են, որ դիմակ չդնելու պատմություն է»։  ԱԺ-ում «Լուսավոր Հայաստան» խմբակցության ղեկավար Էդմոն Մարուքյանն անդրադարձավ համացանցում պարբերաբար տարածվող տեսանյութերին, թե ինչպես են ոստիկանները քաղաքացիների նկատմամբ դիմակ չկրելու համար բռնություն կիրառում։

Ըստ Մարուքյանի՝ սա դատապարտելի է, լավագույն դեպքում ոստիկանությունը կարող է տուգանել քաղաքացուն.

«Ես նախ դատապարտում եմ այդ ոչ իրավաչափ քայլերը և նաև պարոն Միրզոյան, կոչ եմ անում միանալ մեր կոչին և պահանջենք ծառայողական քննություն նշանակեն նման իրավիճակներում: Սա խայտառակություն է: Քաղաքացիների փողոցներում անարգում եւ իրավունքները ոտնահարում են։ Կոչ եմ անում Ձեզ, որպես ԱԺ նախագահ, միանալ այս կոչին»,-ասաց նա:

«Իմ քայլը» խմբակցության պատգամավոր Արմեն Խաչատրյանը հակադարձեց՝  դատապարտելուց առաջ պետք է նախ պարզել, թե ինչ է եղել.

«Բոլոր փաստերով իրականացվում է ծառայողական քննություն և քննության արդյունքներից հետո կարող ենք ինչ-որ բան դատապարտել, կամ չդատապարտել: Ասեմ, որ բոլոր տեսանյութերում նկարագրված իրավիճակները շատ կարճ, հատուկ մոնտաժված տեսանյութեր են: Նախապատմությունը, ոչ մեկը չգիտի, թե ինչ է եղել, ինչպիսի դիմադրություն են ցույց տվել ոստիկաններին և այլն: Սպասենք ծառայողական քննությանը, որից հետո կամ կդատապարտենք, կամ կասենք՝ ապրեք, լավ եք աշխատել»:

ԱԺ նախագահ Արարատ Միրզոյանն էլ հավելեց, որ օրենսդրությունը նախատեսում է տարբեր պատժաչափեր՝ տարբեր տեսակի հանցագործությունների համար, քաղաքացին ունի բոլոր իրավունքները.

«Կյանքն է այդպիսին, որ որոշ մարդիկ անում են զանցանքներ, հանցանքներ, որի համար կա իրավապահ համակարգ։ Եթե սահմանված նորմերը խախտվում են եւ դրանց համար սահմանված են  տուժանքներ, ոստիկանությունը պարտավոր է դա իրականացնել: Եթե դուք կարծում եք  որ առանձին դրվագներում ոստիկանությունը վերազանցել էիր լիազորությունները, կլինի քննություն, ընթացքում կերևա»,- եզրափակեց ԱԺ նախագահը։

Աղբյուր` Փաստինֆո