Փաստ ինֆո

«ՍԴ-ի շուրջ ճգնաժամը վերջացել է, բայց սա չի նշանակում, թե ձևավորվել է իդեալական ՍԴ»,- այս մասին հայտարարել է ՀՀ վարչապետ Նիկոլ Փաշինյանը՝ ԱԺ-Կառավարություն հարցուպատասխանի ժամանակ անդրադառնալով Սահմանադրական դատարանի դատավորի երեք թեկնածուի ընտրությանը:

«Ասում եք՝ հանրության շրջանում հարցեր են առաջացել: Սահմանադրական դատարանի դատավորների ընտրության պրոցեսում նաև կային մարդիկ, կային շրջանակներ, որոնք անընդհատ ուզում էին խոսել հեղափոխության արժեքների մասին, անընդհատ փորձում էին իրավիճակը համեմատել հեղափոխության արժեքների հետ: Այնպիսի տպավորություն էր, որ հեղափոխության ժամանակ հեղափոխությունը կառավարած կամ ղեկավարած քաղաքական թիմը գաղափար չունի հեղափոխության արժեքների մասին, և մարդիկ, ովքեր հեղափոխության մասին իմացել են մայիսի 8-ից մի շաբաթ հետո, դարձել են հեղափոխության արժեքների ջերմեռանդ պաշտպաններ: Այդպե՞ս է արդյոք, ես ուզում եմ ասել, որ ոչ, ես ասում եմ, որ այդպես չէ»,- նշեց Փաշինյանը:

«Ամեն իրավիճակում կան խմբեր, կան ուժեր՝ քաղաքական և ոչ քաղաքական, որոնք ուզում են իրենց օրակարգը, իրենց շահերը, իրենց մարդկանց, իրենց թեկնածուներին, իրենց կամակատարներին հանրության անունից որոշակի տեղերում տեղավորել: Եվ ես կարծում եմ, որ այն ինչ տեղի է ունեցել ԱԺ-ում, կարևոր բան է տեղի ունեցել՝ Սահմանադրական դատարանի շուրջ ճգնաժամը վերջացել է, փակվել է: Առնվազն այսքանով պետք է արձանագրել, որ տեղի է ունեցել կարևոր մի բան: Արդյոք սա նշանակո՞ւմ է, որ ձևավորվել է իդեալական Սահմանադրական դատարան: Ոչ, չի նշանակում, թե ձևավորվել է իդեալական Սահմանադրական դատարան: Կառավարությունն էլ թեկնածուների մասին որոշումը կայացրել է լիազորությունների շրջանակներում»,- հայտարարեց Նիկոլ Փաշինյանը:

Աղբյուր` Փաստինֆո