Փաստ ինֆո

ԱԺ նախկին պատգամավոր Մանվել Գրիգորյանի եղբորորդու՝ Հրանտ Գրիգորյանի վերաբերյալ քրեական գործն արդեն նոր քննության է ուղարկվել՝ դատարան։ «Դատալեքս» համակարգից «Փաստինֆո»-ն տեղեկանում է, որ քրեական գործը դատարան մուտք է եղել սեպտեմբերի 15-ին և նույն օրը մակագրվել է Արմավիրի մարզի ընդհանուր իրավասության դատարանի դատավոր Արթուր Ադամյանին։ 

Նշենք, որ խոսքը գնում է 26 տարի առաջ կատարված Մհեր Պողոսյանի մահվան դեպքի մասին, որը Վերաքննիչ դատարանի որոշմամբ պետք է ուղարկվի նոր քննության։ Վերաքննիչ դատարանի որոշման դեմ վճռաբեկ բողոք էր ներկայացրել Հրանտ Գրիգորյանի փաստաբանը, սակայն դատարանը մերժել էր վարույթ ընդունել բողոքը։ Այլ կերպ ասած՝ դատարանի որոշումը մտել է օրինական ուժի մեջ և գործով պետք է նոր քննություն իրականացվի։ «Փաստինֆո»-ի հետ զրույցում Գրիգորյանի փաստաբանը մտահոգություն էր հայտնել այն մասին, որ քրեական գործի վերաբացումը կառաջացնի իրավաբանական քաոս, քանի որ գործի նյութերն արխիվացվել և ոչնչացվել են։

Ըստ դատական տեղեկատվական համակարգում առկա տեղեկությունների՝ Հրանտ Գրիգորյանին մեղադրանք է առաջադրվել այն բանի համար, որ նա ծառայելով ՀՀ ՊՆ թիվ N զորամասում, որպես վաշտի հրամանատարի տեղակալ, կոչումով ավագ լեյտենանտ, 1994թ. ապրիլի 16-ին ժամը 21-ի սահմաններում ոգելից խմիչք օգտագործած վիճակում վիճաբանության, այնուհետև քաշքշոցի ու կռվի մեջ մտնելով Էջմիածնի էլեկտրոցանցի տնօրեն Նորիկ Կարապետյանի հետ, խախտելով զենքի հետ վարվելու կանոնները իրեն ամրացված «Մակարով» տեսակի թիվ 887 ատրճանակով կրակ է բաց արել դեպի օդ, այնուհետև ստանալով հարված ընկել է վայր և շարունակել անկանոն կրակել տարբեր ուղղություններով, որի հետևանքով Մհեր Պողոսյանը ստանալով կյանքի համար վտանգավոր երկու գնդակային հրազենային վնասվածքներ, հիվանդանոցում մահացել է: Գրիգորյանը գործով չպարզված ոմն Վաչոյի հետ դեպքի վայրից դիմել է փախուստի վերջինիս «Նիվա» մակնիշի ավտոմեքենայով:

Արձանագրենք, որ դատավորը, ում մակագրվեծ է վերաբացված գործի քննությունը, 2001թ առ այսօր աշխատում է Արմավիրի մարզի ընդհանուր իրավասության դատարանում՝ որպես դատավոր։ Նրա վարկանիշը սեպտեմբերի 16-ի դրությամբ 3 միավոր է։ Դեռևս առկա չէ տեղեկություն՝ գործը վարույթ ընդունելու վերաբերյալ։

Հիշեցնենք, որ 1994թ Աշտարակի նախկին ժողդատարանի կողմից կայացված դատավճռով Հրանտ Գրիգորյանը մեղավոր էր ճանաչվել 1961 թ ընդունված ՀՀ քրեական օրենսգրքի 259.1-րդ հոդվածի «Բ» կետով՝ զենքի հետ վարվելու կանոնների խախտմամբ Մհեր Պողոսյանին մահ պատճառելու համար և դատապարտվել է ազատազրկման՝ 1 տարի ժամկետով։ Դատավճիռը չի բողոքարկվել ու այն մտել է օրինական ուժի մեջ:

24 տարի անց` 2018թ հուլիսի 12-ին, Էդուարդ Պողոսյանը՝ Մհեր Պողոսյանի որդին, հանցագործության մասին հաղորդում է ներկայացրել` պնդելով, թե իր հայրն իրականում սպանության զոհ է դարձել. 1994 թ ապրիլի 16-ին Արմավիրի մարզի Ակնալիճ գյուղի տարածքում գործող ռեստորանային համալիրում վիճաբանության ընթացքում սպանել է Հրանտ Գրիգորյանը, սակայն դեպքի հանգամանքները խեղաթյուրելու արդյունքում Գրիգորյանը դատապարտվել է 1 տարվա ազատազրկման։
Հանցագործության մասին հաղորդման հիման վրա ՀՀ ոստիկանության Վաղարշապատի բաժնում հարուցվել է քրեական գործ՝ պաշտոնատար անձի կողմից անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելու, կեղծում մտցնելու դեպքի առթիվ, որի նախաքննությունը կատարվել է ՀՀ ՔԿ զինվորական քննչական գլխավոր վարչությունում։ ՀՀ զինվորական կենտրոնական դատախազության զինվորական ծառայության դեմ ուղղված հատկապես կարևոր գործերով քննության նկատմամբ հսկողության բաժնի դատախազ Վ. Հարությունյանի որոշմամբ հարուցվել է վարույթ՝ նոր իհայտ եկած հանգամանքների հիման վրա։

2019թ փետրվարի 20-ին ՀՀ զինվորական դատախազ, ՀՀ գլխավոր դատախազի տեղակալ Վ. Հարությունյանի որոշմամբ վերաքննիչ բողոք է ներկայացվել՝ դատավճիռը նոր ի հայտ եկած հանգամանքների հիման վրա վերանայելու համար։ Վերաքննիչ քրեական դատարանը որոշել է քրեական գործն ուղարկել Առաջին ատյանի դատարան` նոր դատաքննության: Վերաքննիչ դատարանի որոշման դեմ փաստաբան Հովսեփ Սարգսյանը վճռաբեկ բողոք է ներկայացրել, որը վարույթ չի ընդունվել։

Հեղինակ՝ Իզաբել Սահակյան

Աղբյուր` Փաստինֆո