Փաստ ինֆո

Սահմանադրական դատարանը թևակոխեց ճգնաժամային իրավիճակ։ Այս մասին «Փաստինֆո»-ի հետ զրույցում ասաց սահմանադրագետ Գոհար Մելոյանը։ 

Վերջինիս խոսքով ՍԴ-ում իրականացվող գործընթացներն իրավական առումով իրենց սպառել են։ Սահմանադրագետը քաղաքական որակեց այս գործընթացը. «ՍԴ դատավորներին հաջողվում էր ապահովել այդ մարմնի բնականոն գործունեությունը և արդյունավետորեն իրականացնել սահմանադրական արդարադատություն։ Հակաիրավական բնույթի այս փոփոխության արդյունքում այս մարմինը կաթվածահար եղավ։ Դա իշխող ուժի կիսալուծումներով ուղեկցվող գործողությունների ադրյունք էր։ Օրենսդրական փոփոխությունների արդյունքում ստեղծվեց իրավիճակ, որ մարմնում նույնիսկ քվորումի հարց առաջացավ։ Մինչ օրս ավելի ընդլայնվեց այն սուբյեկտների շրջանակը, որոնց իրավունքները ոտնահարում են»,-ասաց Գոհար Մելոյանը՝ նկատելով, որ եթե անգամ այդքան ցանկալի վերջնանպատակը կար, առնվազն պետք է անցումային ժամանակահատված սահմանվեր դատավորների լիազորությունների դադարեցման համար, որպեսզի նրանց վարույթներում գտնվող գործերի ճակատագրերին լուծումներ տրվեին։

Սահմանադրագետի կարծիքով արդեն իսկ զավեշտալի էր ՍԴ դատավորների թեկնածուների ներկայացման պրոցեսը. «Մտահոգիչ էր անգամ թեկնածուների կողմից իրենց մասնակից դառնալն այս պրոցեսին։ ՍԴ այն դատավորները, որոնց լիազորությունները դադարեցվեցին, իրավունքները պետք է դեռևս ՄԻԵԴ-ում վիճարկվեն և հնարավոր է հետագայում իրավունքի վերակագնման վերաբերյալ որոշում կայացվի և խնդրահարույց կլինի այս դատավորների պաշտոնավարումը։ Այն իրավական հիմքը, որի հիման վրա իրենց դատավոր են նշանակում, առնվազն վիճարկելի է»,-ասաց Գոհար Մելոյանը։

Հարցին՝ ՍԴ դատավորների ընտրությունից հետո որքանով ՍԴ ճգնաժամը կվերանա, Գոհար Մելոյանը նկատեց՝ ՍԴ-ի շուրջ ընթացող պրոցեսները հիմնված են պոպուլիստական հայտարարությունների վրա. «Ակնհայտ էր, որ նպատակը իշխող ուժի հպատակ, կառավարելի ՍԴ-ի ձևավորումն էր։ Թեկնածուների ընտրությունն էլ այդ տրամաբանության ներքո է։ Եթե նոր մարմին են փորձում ձևավորել, ինչո՞վ է պայմանավորված նույն Երվանդ Խունդկարյանի թեկնածությունը, ով նախկին համակարգում է աշխատել երկար տարիներ։ Այդ հարցադրումներն առաջանում են»,-ասաց սահմանադրագետը՝ հույս հայտնելով, որ նորընտիր դատավորները հնարավորինս մասնագիտական արժանապատվությամբ հանդես կգան, ինչ նախկինում արեցին ՍԴ 7 դատավորները։

Հիշեցնենք, որ այսօր Ազգային ժողովն ընտրեց Սահմանադրական դատարանի դատավորներ։ ԱԺ-ն կողմ քվեարկեց ՍԴ դատավորի պաշտոնում առաջադրված երեք թեկնածուներին՝ Երվանդ Խունդկարյանին, Արթուր Վաղարշյանին և Էդգար Շաթիրյանին։

Հեղինակ՝ Հասմիկ Կոշկարյան

Աղբյուր` Փաստինֆո