Փաստ ինֆո

Ծաղկաքաղի արդյունքում ձևավորված քրեական գործ է։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց ՀՀ երկրորդ նախագահ Ռոբերտ Քոչարյանը։

Նրա խոսքով՝ այն խորհրդակցությունը, որն իրականացվել էր փետրվարի 23-ին նախագահականում, հետևանք էր ԵԿՄ-ում գործընթացների, բայց այդ գործընթացների վերաբերյալ որևէ փաստաթուղթ չկա քրեական գործի նյութերում։

«Հետևանքի մասին կա, բայց թե ինչի համար է այդ խորհրդակցությունը եղել, դրա նյութը չկա, հիմա մենք ո՞նց հավատանք, որ այդպիսի նյութեր ընդհանրապես չեն եղել»,- ասաց Քոչարյանը՝ նշելով, որ, եթե չի սխալվում, գործի 80 հատորի մեջ առկա է ԱԱԾ-ից ընդամենը 3 նամակ։ «Դուք հավատու՞մ եք, որ հնարավոր է, որ այդպիսի իրադարձությունների պարագայում ԱԱԾ-ում լիներ զրոյական փաստաթուղթ։ Նամակներից մեկը հետևյալն է. փետրվարի 24, ասում են, որ կա որոշում քրեական գործ հարուցելու մասին սահմանադրական կարգը տապալելու վերաբերյալ և կա նամակ, որ մարտի 2-ին այդ գործը փոխանցվում է դատախազությանը՝ 3 հատոր, մոտ 350 էջ։ Չկան, մենք այդ հատորներին ծանոթ չենք, հիմա փետրվարի 24-ից մինչ մարտի 1 որոշակի գործընթացներ են կատարվել»,- ասաց նա՝ ընդգծելով, որ շատ են այնպիսի փաստարկները, երբ նույն իրադարձության շուրջ անձ է հարցաքննվել, ում հարցաքննությունը ներառվել է դատարան ուղարկված գործում, իսկ նրա հետ եղած և հարցաքննված այլ անձանց ցուցմունքները դատարան չի ուղարկվել։

«Այն, ինչ ներկայացվել է, ծաղկաքաղ են արել, իրենց ուզած ձևով ներկայացրել, ծաղկաքաղի արդյունքում ձևավորված քրեական գործ է»,- ընդգծեց երկրորդ նախագահը։
ՀՀ ՊՆ նախկին նախարար Սեյրան Օհանյանն էլ հաստատեց, որ 2008թ փետրվարի 23-ին կայացված խորհրդակցության վերաբերյալ որևէ տեղեկություն չկա գործի նյութերում, ավելին, նշեց, որ թիվ 0038 հրամանը 79 հատոր նյութերում ծայրից ծայր գնում է, և բանակի դերակատարությունը նշվում է որպես բացասական երևույթ, բայց հարկ համարեց հայտնել, որ խորհրդակցության ժամանակ ԵԿՄ-ում տեղի ունեցող գործընթացներից բացի քննարկվել է նաև այն, որ շատ զինվորականներ, այդ թվում՝ շատ բարձրաստիճան զինվորականներ, ըստ ԱԱԾ-ի տեղեկությունների՝ քայլում էին զինված խմբերով, որոնց թվում եղել են նաև զորամասերի հրամանատարներ, սակայն այդ տեղեկություններից որևէ բան ներառված չէ գործի նյութերում։ Բացի այդ՝ ԱԱԾ-ի տեղեկություններով զենքեր են եղել նաև հանրահավաքի մասնակիցների մոտ, հատկապես՝ պատերազմի մասնակիցների։

Օհանյանն ընդգծեց, որ այդ օրերին զորամասերն ուժեղացվել են, որովհետև ամեն օր տեղեկություն էին ստանում, որ նախատեսվում է զորամասերի կամ այլ զինվորական օբյեկտների վրա հարձակումներ՝ զենք հայթայթելու և հետագայում օգտագործելու նպատակով և այդ տեղեկությունները ևս ներառված չեն գործի նյութերում։

Նրա խոսքով՝ գործի նյութերում ներառված չէ, թե ինչու է ինքը՝ որպես ԳՇ պետ ուժեղացրել հսկողությունը, ըստ նրա՝ ԱԱԾ փաստաթղթերում պետք է լինեն այդ տեղեկությունները, բայց գործի նյութերում իրենք դա չեն տեսնում։ «Այնպես չէ, որ օդից ուժեղացրինք՝ 0038 հրամանը գրելով»,- ասաց Օհանյանը։

Ավելի վաղ հայտնել ենք, որ Ռոբերտ Քոչարյանի և Սեյրան Օհանյանի պաշտպանները միջնորդություն են ներկայացրել դատարան՝ պաշտպանական կողմին «Մարտի 1»-ի մայր գործով նյութերը տրամադրելու մասին։

Հիշեցնենք, որ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո