Փաստ ինֆո

Կրթական ու առողջապահական ոլորտի փորձագետներն աբսուրդային ու անհեթեթ են որակում 65 տարեկան եւ բարրձր տարիքային խմբերի դասախոսներին ազատելու ՀՀ առողջապահության նախարար Արսեն Թորոսյանի նախաձեռնությունը։

Հիշեցնենք՝ մամուլին հայտնի էր դարձել, որ նախարարի գրությամբ հրամայված է բոլոր բուհերին ու միջին մասնագիտական հաստատություններին ազատվել 65 և ավել տարիք ունեցող բոլոր դասախոսներից, ընդ որում` անորոշ ժամկետով և նույն հրամանում հրահանգվում է հապճեպ ընտրել նրանց արժանի փոխարինող երիտասարդ կադրեր:

Այսօր վաղ առավոտյան ՀՀ առողջապահության նախարարությունը հայտարարել էր, թե հրամանը դեռ ստորագրված չէ, այն հրամանի նախագիծ և գտնվում է քննարկումների և լրաշմակումների փուլում՝ փաստացի հաստատելով նախարարի կողմից նման նախաձեռնությամբ հանդես գալը՝ պատճառաբանելով, թե դա օրվա հրամայականն է։

«Փաստինֆո»-ի հետ զրույցում կրթության հարցերով փորձագետ Ատոմ Մխիթարյանը նախագիծը որակեց անհիմն, ոչինչ չասող: «Նախ դա ընդhանրապես Արսեն Թորոսյանի գործառույթների մեջ չի մտնում եւ խոչընդոտում է կրթական գործընթացներին: Անհիմն որոշում է, ես այժմ աշխատում եմ Գիտությունների ազգային ակադեմիայում, այստեղ դասախոսների մեծ մասը տարիքային այդ խմբում են,՝ աշխատանքից բոլորին ազատե՞նք: Ես գտնում եմ, որ նրանց պետք է խրախուսել, այլ ոչ թե ազատել աշխատանքից»,- ասաց Ա.Մխիթարյանը:

«Պարացելսուս» ՀԿ-ի նախագահ Նունե Ավանեսյանն էլ հավաստիացրեց, որ նախագիծը աշխատողների իրավունքների կոպիտ խախտում է, և այս ամենը բերելու է անտարբերության: «Որոշումը շատ հապճեպ է ընդունվել, երբ արդեն դասացուցակները կազմված են եղել, մարդիկ իմացել են իրենք աշխատանքի են, սա նաև աշխատողների իրավունքների կոպիտ խախտում է, գոնե երկու ամիս առաջ պետք է ծանուցեին: Մենք աշխատանքային օրենսգրքում էլ նման կետ չունենք, որ մարդիկ 65-ից հետո անգործունակ են: Նախարարը այս ամենը ներկայացրել է իբրև «հոգատարություն» մեծահահասակների նկատմամբ, բայց այս ամենը վերածվելու է անտարբերության: Մարդկանց պետք է պարապուրդ վճարեն, բայց մենք գիտենք, որ բյուջեում այսքան գումար չունենք»,- ասաց Նունե Ավանեսյանը:

«Ինչպես Արսեն Թորոսյանի մյուս որոշումներում, այս դեպքում նույնպես տրամաբանություն չկա, անհեթեթություն է: Ես անհեթեթություններ չեմ մեկնաբանում»- մեզ հետ զրույցում ասաց ԵՊՀ Հայոց պատմության ամբիոնի վարիչ, Արտակ Մովսիսյանը: ԵՊՀ բանասիրության ֆակուլտետի 80-ամյա դասախոս Վազգեն Գաբրիելյանն էլ վստահ է, որ նախագծով չի ենթադրվում, որ տարեց դասախոսները չեն դասավանդելու համալսարանում, փոխարենը՝ դասավանդելու են առցանց: «Նախագծին նոր եմ ծանոթացել: Շատ դեպքերում այն սխալ է մեկնաբանվում, ըստ նախագծի՝ 65 և բարձր տարիքի դասախոսները ոչ թե պետք է չգան դասի, այլ՝ տանից աշխատեն, մարդկանց հետ շփումը սահմանափակելու նպատակով: 65-ից ցածր դասախոսներն էլ, ինչպես նաև ուսանողները, պետք է էպիկրիզ բերեն, բայց սա էլ հիմարություն է, շատ մարդիկ կան քրոնիկ հիվանդություններ ունեն ու չեն էլ ցանկանում, որ մնացածն իմանան առողջական խնդիրի մասին, ինչի՞ պետք է բոլորն իմանան»:

Աղբյուր` Փաստինֆո