Փաստ ինֆո

Ինչու՞ ՍԴ դատավորի թեկնածուների հետ չի կազմակերպվել հանդիպում։ Այս մասին ԱԺ-ում ասաց «Լուսավոր Հայաստան» խմբակցության ղեկավար Էդմոն Մարուքյանը՝ դիմելով ԱԺ նախագահ Արարատ Միրզոյանին։

«Ինչպե՞ս է եղել, որ միշտ կազմակերպվում էր։ Միշտ մտածում էի՝ գնալով ավելի լավ կլինի, բայց ոնց որ գնալով ավելի վատ ա լինում։ Այսինքն այդ պրակտիկան էլ վերացավ։ Ցանկացած մարմնի ղեկավար, պաշտոնյա կամ թեկնածություն երբ առաջադրվում է, թեկնածուի հետ խմբակցությունները հանդիպում են թեկնածուի կամ առաջադրող մարմնի նախաձեռնությամբ։ ԱԺ նախագահին դիմե՞լ են նման բան կազմակերպելու համար, թե ոչ»,-ասաց Էդմոն Մարուքյանը։

ԱԺ նախագահ Արարատ Միրզոյանն արձագանքեց. «Պարոն Մարուքյան, ես տրամագծորեն հակառակ կարծիքն ունեմ Ձեր այն պնդման մասին, թե գնալով ավելի վատանում է։ Ըստ իս գնալով ամեն ինչ էլ շատ լավանում է, հատկապես թեկնածուների և թափանցիկության, ԱԺ խմբակցությունների միջև քննարկումների առումով։ Ինչ վերաբերում է կոնկրետ մասնավոր հարցին, պետք է նշեմ, որ ո՛չ ֆրակցիաների կողմից, ո՛չ թեկնածուների կողմից այդպիսի նախաձեռնություն չի եղել։ Ցանակացած նախաձեռնության դեպքում ԱԺ նախագահը և աշխատակազմը կանեին ամեն ինչ, որպեսզի պատշաճ պայմաններ ապահովեին նման հանդիպման համար»,-ասաց ԱԺ նախագահը։

Էդմոն Մարուքյանն ընդգծեց, որ նախկինում թեկնածուներին առաջադրող մարմինները նախաձեռնում էին նման հանդիպումներ, իսկ հիմա չեն նախաձեռնում. «Հիմա դա լավանու՞մ է, թե՞ վատանում է։ Ինձ թվում է՝ վատանում է։ Լավ փորձ կար, հիմա վատ փորձի ենք անցնում, որովհետև այդ հանդիպումների ժամանակ քննարկվում էր թեկնածուների հետ նրանց տեսլականը, նշված մարմնում նրանց առաքելության վերաբերյալ, հիմա այդ պրակտիկան չկա»,-նշեց Էդմոն Մարուքյանը։

Աղբյուր` Փաստինֆո