Փաստ ինֆո

Սպանություն կատարելու մեջ մեղադրվող Էդվարդ Մարկոսյանն ավելին քան երկու տարի է, ինչ անազատության մեջ է, թեև պնդում է, որ անմեղ է ։

Նշենք, որ Մարկոսյանը մեղադրվում է 2018թ ապրիլի 1-ին՝ ժամը 20։30-ի սահմաններում Սյունիքի մարզի՝ Որոտան-Գորիս ավտոճանապարհին՝ Արայիկ Մարկոսյանի հուշաղբյուր կոչվող վայրում Ռոմիկ Օհանջանյանի սպանության մեջ։ Ըստ մեղադրանքի՝ նշված վայրում վերջինս դիտավորությամբ դանակով մեկ անգամ հարվածել է Օհանջանյանի որովայնին՝ պատճառելով կյանքին վտանգ սպառնացող ծանր մարմնական վնասվածք, ինչի հետևանքով վերջինս մահացել է։ Քրեական գործն արդեն տևական ժամանակ է, ինչ գտնվում է Սյունիքի մարզի ընդհանուր իրավասության դատարանի վարույթում եւ դատաքննությունն արդեն մոտենում է ավարտական փուլին՝ առաջիկա դատական նիստում նախատեսվում է, որ կսկսվի դատական վիճաբանությունների փուլը, մեղադրող դատախազը կհրապարակի մեղադրական ճառը։

Մեղադրյալն իրեն մեղավոր չի ճանաչում։ Մարկոսյանի պաշտպան Համլետ Դավթյանը «Փաստինֆո»-ի հետ զրույցում պատմեց, որ սկզբնական շրջանում քրեական գործով մեկ այլ մեղադրյալ է եղել, ով ընդունել էր իր մեղավորությունը, սակայն նրա նկատմամբ քրեական հետապնդումը դադարեցվել էր և ազատ արձակվել։ Տուժողի հարազատների ցուցմունքների հիման վրա մեղադրանք է առաջադրվել Մարկոսյանին, ինչպես հայտնեց փաստաբանը, տուժողի որդին ցուցմունք է տվել, որ դեպքի վայրում ականատես է եղել, թե ինչպես է դանակով հարվածել Մարկոսյանը, մինչդեռ՝ Մարկոսյանը պնդում է՝ դա իրականությանը չի համապատասխանում։ Ավելին՝ Օհանջանյանի որդին, ով պնդում է, որ ականատես է եղել միջադեպին, ըստ փաստաբանի, դեպքի վայրում չի եղել, այլ եկել է միայն միջադեպից հետո։

Պաշտպանի փոխանցմամբ՝ տուժողի որդին ևս սկզբնական շրջանում հայտարարել էր, թե միջադեպի ժամանակ դեպքի վայրում չի եղել։ Ինչ վերաբերում է կեղծ ցուցմունքին և սուտ մատնությանը, ապա փաստաբանը նշեց, որ այդ հարցը կբարձրացվի միայն արդարացման դատավճռից հետո ։ Իսկ թե որն է եղել ճակատագրական դարձած վիճաբանության պատճառը, պաշտպանը հայտնեց, որ կոնֆլիկտը եղել է նախկին մեղադրյալի հետ, ում նկատմամբ քրեական հետապնդումն արդեն դադարեցվել է, մասնավորապես, վերջինս հայտնել էր, որ տուժողի անասունները մտել են իր հողամասը, ինչի պատճառով էլ առաջացել է վիճաբանությունը, իսկ վիճաբանությունից հետո հավաքվել են՝ պարզաբանումներ ստանալու։

Մարկոսյանի կինը՝ տիկին Համեստը «Փաստինֆո»-ին պատմեց, որ միջադեպին մասնակից անձանցից որևէ մեկն իր ամուսնու դեմ ցուցմունք չի տվել, իսկ տուժողի որդին ցուցմունք է տվել, որ իր հորը Մարկոսյանն է դանակահարել, սակայն չի տեսել դանակահարելու պահը, մինչդեռ, առերես հարցաքննության ժամանակ պնդել է, որ անձամբ է տեսել։ Վերջինս պնդեց՝ ամուսնուն մեղադրանք է առաջադրվել կեղծ ցուցմունքի հիման վրա և կան փաստեր, որոնք վկայում են, որ ցուցմունքը կեղծ է եղել։

Հեղինակ՝ Իզաբել Սահակյան

Աղբյուր` Փաստինֆո