Փաստ ինֆո

Բուհեր չընդունված դիմորդների ներկայացրած երկու հայցերից մեկը վարույթ է ընդունվել, իսկ մյուսը խոչընդոտներ է հանդիպում։ Այս մասին լրագրողների հետ հանդիպմանն ասել է փաստաբան Ալեքսանդր Կոչուբաևը։ 

Առաջին հայցը վերաբերում է Կառավարության որոշումն անվավեր ճանաչելուն, որով սահմանվեց ընդունելության նոր կարգ և փաստաբանի խոսքով, այդտեղ կային իրավական անգրագիտության հետ հատվող խնդիրներ, իսկ երկրորդ հայցով պահանջել են

‹‹Պարտավորեցնել ՀՀ կրթության, գիտության, մշակույթի և սպորտի նախարարությանը հայցվորների նկատմամբ ընդունել բարենպաստ վարչական ակտ, այն է՝ ընդունել հայցվորների նկատմամբ ՀՀ կառավարության 2012 թվականի ապրիլի 26-ի թիվ 597-Ն որոշումը կիրառելի իրավունք համարելու մասին անհատական իրավական ակտ››։

Ավելի վաղ «Փաստինֆո»-ն հայտնել է, որ երկրորդ հայցադիմումը դատարանը վերադարձրել է՝ նշելով, որ համահայցվորները խնդրում են պարտավորեցնել վարչական մարմնին բարենպաստ վարչական ակտ ընդունելու միջոցով ՀՀ կառավարության 2012 թվականի ապրիլի 26-ի թիվ 597-Ն որոշումը հայցվորների նկատմամբ կիրառելի իրավունք համարել, որպիսի ձևակերպումն անորոշ է և չափազանց վերացական։
Ըստ փաստաբանի՝ հայցադիմումը վերադարձնելու առաջին որոշումից հետո փորձեցին համակերպվել, հասկանալ, որ դատարանը հայցատեսակի հետ կապված խնդիր է տեսել, որը փաստաբանական թիմը չի տեսել, սակայն չենք գնացել Վերաքննիչ դատարան՝ խնայելով դիմորդների ժամանակը, որն իրենք չունեն, փոփոխել հայցապահանջը, որտեղ դատարանն արդեն նոր պահանջ է դրել՝ անհրաժեշտ համարելով դատարանին ներկայացնել դիմորդների ստորագրած դիմումները։

«Վարչական դատարանը կոչված է ֆիզիկական անձանց համար ստեղծելու այնպիսի միջավայր, որտեղ ձևական պահանջները ստորադասվեն և բովանդակությունը բարձրանա, մինչդեռ, Վարչական դատարանը նման պահանջ դրեց»,-ասաց նա՝ նշելով, որ դատարանի քմահաճույքով այս անգամ չեն առաջնորդվի և այս անգամ էլ դատարանի կողմից՝ հայցադիմումը վարույթ չընդունելու դեպքում կդիմեն արդեն վերաքննիչ դատարան։

Ըստ Կոչուբաևի՝ սա խոսում է այն մասին, որ իշխանությունը զգայուն գործերով ճնշում է դատավորներին, ինչի վառ ապացույցն այս գործն է, քանի որ այն իշխանության համար շատ զգայուն է և ցույց է դնելու Կառավարության անգրագիտությունը։
«Կառավարությունը սեփական անգրագիտությունը քողարկելու համար սկսում է ճնշել դատավորներին։ Գործադիրը շարունակում է «թաթը» պահել դատական իշխանության վրա»,- ասաց Կոչուբաևը։

Անդրադառնալով կրթական բարեփոխումներին՝ փաստաբանը մտահոգություն հայտնեց առ այն, որ իր մոտ տպավորություն է, որ մենք քաղաքականություն ունենք, որն ուղղված է տապալելու հայկական կրթական ոլորտը, որովհետև դրանք ոչ մի ձևով բարեփոխումներ անվանել չես կարող, քանի որ սերունդներին տանում են դեգրադացման։ Նրա խոսքով՝ իշխանությունը հետևողականորեն փորձում է լռեցնել երիտասարդների ձայնը։

Աղբյուր` Փաստինֆո