Փաստ ինֆո

ՍԴ դատավորի թեկնածու Երվանդ Խունդկարյանն ԱԺ-ում իր ելույթի ժամանակ անդրադարձավ սահմանադրական արդարադատության խնդիրներին։

«Սահմանադրական արդարադատությունը ՀՀ-ում անցել է ձևավորման և կայացման որոշակի ճանապարհ, որը պայմանականորեն կարող ենք բաժանել երեք փուլի։ Առաջին փուլի մեկնարը տրվեց 1995 թ.-ին ՀՀ Սահմանադրության ընդունմամբ, որով նախատեսվեց ՍԴ կազմավորման կարգը և լիազորությունների շրջանակը առանց ամրագրելու սահմանադրական արդարադատության ոլորտում ՍԴ-ի մասնագիտացված մարմին լինելու հանգամանքը։ Երկրորդ փուլի սկիզբը դրվեց 2005 թ.-ին տեղի ունեցած սահմանադրական բարեփոխումներով, ի տարբերություն մայր օրենքի սկզբնական տարբերակի՝ 2005 թ.-ի փոփոխություններով ՀՀ սահմանադրությունն ուղղակիորեն ամրագրեց, որ ՀՀ-ում սահմանադրական արդարադատությունն իրականացվում է ՍԴ-ի կողմից։ Այսկերպ ընդգծվեց իրավական այն կարևոր գաղափարը, որ ՀՀ-ում սահմանադրական արդարադատությունն իրականացվում է հատուկ մասնագիտացված մարմնի կողմից։ Սահմանադրական արդարադատության զարգացման հաջորդ փուլը կապված է 2015 թ.-ին կայացված հանրաքվեի արդյունքում ՀՀ սահմանադրության փոփոխությունների ընդունման հետ։ 2015 թ.-ի խմբագրությամբ սահմանադրությունը փոփոխեց ՍԴ դատավորների ընտրության կարգը։ Դատական իշխանության մասնակցությունը կարևորում եմ ՍԴ գործունեության արդյունավետությունը բարձրացնելու առումով։ Արդարադատության իրականացումը կարևորագույն գործունեություն է, որի առաջնահերթ նպատակը մարդու իրավունքների երաշխավորված պաշտպանությունն է։ Նման գործառույթի իրականացումը ենթադրում է մասնագիտական բարձր որակների և փորձառության անհրաժեշտություն, իսկ այդպիսի հատկանիշների ձեռքբերման լավագույն միջոց կարող է լինել որպես դատավոր ընդհանուր իրավասության կամ մասնագիտացված այլ դատարանում պաշտոնավարումը»,-ասաց Երվանդ Խունդկարյանը։

Վերջինս նկատեց՝ դատական իշխանության ներկայացուցիչների մասնակցությունը ՍԴ կազմում մի կողմից լուծում է պրակտիկ իրավաբանների ներկայության ապահովման հարցը դատական այս ատյանում, մյուս կողմից՝ կարող է նպաստել մասնագիտացման տարրի ապահովմանը, ինչպես նաև ապահովել կառուցողական երկխոսությունը դատական իշխանության սուբյեկտների միջև։

Աղբյուր` Փաստինֆո