Փաստ ինֆո

Մեկնարկեց Ազգային ժողովի նոր նստաշրջանը։ ԱԺ «Լուսավոր Հայաստան» խմբակցության պատգամավոր Սրբուհի Գրիգորյանը ներկայացրեց «Սոցիալական աջակցության մասին ՀՀ օրենքում» փոփոխություններ և լրացումներ կատարելու մասին նախագիծը։

Սրբուհի Գրիգորյանը նկատեց՝ հասարակության շատ խավեր ներկայում սոցիալական դժվարին իրավիճակում են։ Նախագծով առաջարկվում է միայնակ տարեց և անժառանգ կենսաթոշակառուներին հատկացնել կոմունալ վարձավճարների փոխհատուցում, նվազագույն կենսաթոշակի 20 տոկոսի չափով, ամսական 5000 դրամ։

«Այսինքն նախագծի ուժի մեջ մտնելու դեպքում կծախսվի մոտ 710 մլն դրամ։ Արդյունքում մենք կունենանք իրենց հացի փողը կոմունալ վարձավճարների համար չծախսող միայնակ տարեցներ։ Երբ տանը երկու կենսաթոշակառու կա, նրանցից մեկի կենսաթոշակը տարեցներն ուղղում են կոմունալ վարձավճարներին, իսկ մյուսով հոգում են իրենց սննդի ծախսերը։ Միայնակ տարեցներն այդ հնարավորությունը չունեն։ Գործընկերներս նշեցին, որ այդ միայնակ կենսաթոշակառուների մեջ կան նաև այնպիսիք, որ դրսից դոլար ու եվրո են ստանում։ Գուցե կան, բայց նրանց քա՞նի տոկոսն են կազմում դրսից փող ստացողները։ Կառավարությունն էլ որդեգրել է 1-10 քաղաքացու ավելորդ գումար չտալու համար աչք փակել տասնյակ հազարավոր կարիքավոր քաղաքացիների խնդիրների առջև»,-ասաց Սրբուհի Գրիգորյանը։

ԱԺ առողջապահության և սոցիալական հարցերի հանձնաժողովի նախագահի տեղակալ Հերիքնազ Տիգրանյանն էլ նշեց, որ այս բարի մղումներով նախագիծն իր մեջ որոշակի վտանգներ է պարունակում. «Թվացյալ տպավորություն է ստեղծվում, թե մեր հանձնաժողովն առանց հիմնավորման տվեց բացասական եզրակացություն։ Բանն այն է, որ հիմնավորումները բոլորովին այլ նախագծի մասին է։ Եթե հիշում եք 2019թ.-ի դեկտեմբերի 4-ին ընդունեցինք սոցիալական բնակարանային կացարաններում բնակվող միայնակ կենսաթոշակառուներին նպատակային սոցիալական օգնություն ցուցաբերելու մասին օրենքում փոփոխություն կատարելու նախագիծը, որով սահմանեցինք, որ սոցիալական բնակարաններում բնկավող միայնակ տարեցները կամ կենսաթոշակառուներն արդեն օգտվում են կոմունալ վճարների համար պետության փոխհատուցման իրավունքից։ Այս պահի դրությամբ և՛ օրենքի կարգավորմամբ, և՛ ենթաօրենսդրական ակտերով արդեն իսկ սահմանվել են որոշակի արտոնություններ անապահովության սանդղակում գտնվող ընտանիքների համար։ Խոսքը վերաբերում է նաև միայնակ տարեցներին»,-ասաց Հերիքնազ Տիգրանյանը՝ խնդրելով դեմ քվեարկել նախագծին, քանի որ այն վերանայման կարիք ունի։

Որոշումը չընդունվեց։

Աղբյուր` Փաստինֆո