Փաստ ինֆո

Որևէ մեկն ինձ վրա որպես դատավորի որևէ ազդեցություն ո՛չ ունեցել է, ո՛չ էլ կարող էր ունենալ։ Այս մասին ԱԺ-ում լրագրողների հետ զրույցի ժամանակ ասաց ՍԴ դատավորի թեկնածու Երվանդ Խունդկարյանը։

«Հավատացած եղեք, որ որևէ դատավոր որևէ մեկի քիմքին հաճո արդարադատություն չի իրականացնում։ Չեմ ընդունում այդպիսի դատավորի կերպարը»,-ասաց Երվանդ Խունդկարյանը։

Անդրադառնալով երկու գործարարներին առնչվող գործին՝ Երվանդ Խունդկարյանն ասաց, որ Խուդյանի գործով բազմաթիվ վեճեր են եղել թե՛ սնանկության վարույթին առնչվող, թե՛ քրեական գործերին առնչվող. «Ես հիմա կոնկրետ գործերը չեմ կարող վերլուծել, բայց Խուդյանի գործերով կայացված դատական ակտերն օրինական ուժի մեջ մտած են և դրա վերաբերյալ որևէ դիրքորոշում չեմ կարող հայտնել»,-նշեց Երվանդ Խունդկարյանը։

Դիտարկմանը, որ մերժել է գործարարին, վերջինս էլ միջպետական դատարաններում շահել է, այստեղ տեսնու՞մ է իր թերացումը, Երվանդ Խունդկարյանն ասաց. «Ես հայտնեցի իմ դիրքորոշումը։ Եթե կա օրինական ուժի մեջ մտած դատական ակտ, եթե կա համապատասխան վերաբերմունք, ապա յուրաքանչյուր դեպքում պարտավոր ենք վերլուծել, թե ինչպսին է եղել Վճռաբեկ բողոքի բովանդակությունը, ինչպիսին է եղել Վճռաբեկ դատարանի վարքագիծն այդ բողոքի կապակցությամբ։ Այսինքն ապրիորի ասել, որ խախտում է տեղի ունեցել, ես դա ճիշտ չեմ համարի»,-նշեց Երվանդ Խունդկարյանը։

Աղբյուր` Փաստինֆո