Փաստ ինֆո

Երվանդ Խունդկարյանի թեկնածության քննարկումն այն մասին է, թե ինչպիսին չպետք է լինի ՍԴ դատավորի թեկնածուն։ Այս մասին ԱԺ-ում ասաց պատգամավոր Արման Բաբաջանյանը։

«Ինձ և ԱԺ մյուս պատգամավորներին հասու է դարձել կոռուպցիայի կանխարգելման հանձնաժողովի եզրակացությունը Երվանդ Խունդկարյանին վերաբերող։ Կարծում եմ, որ դա մեր ընտրության համար պետք է կարևոր և առարկայական նշանակություն ունենա, եթե մենք չենք կարևորում այդ զեկույցը, այդ եզրակացությունը, կարծում եմ՝ մենք անդառնալի հարված ենք հասցնում այդ մարմնին։ Հայաստանի իրողություններին անծանոթ մեկի համար Երվանդ Խունդկարյանի կենսագրությունը կարող է շատ տպավորիչ լինել, քանի որ նոմինալ առումով Խունդկարյանը զբաղեցրել է տասնյակ պատկառելի պաշտոններ, բայց այդ փայլը խամրում է այն պահին, երբ հիշում ենք, թե որ համակարգում է Խունդկարյանը զբաղեցրել այդ պաշտոնները և թե ինչպես է նրա անմիջական մասնակցությամբ ապականվել, այլանդակվել այդ կարևորագույն պետական ինստիտուտը։ Ինչպես է Խունդկարյանի պաշտոնավարման ժամանակ այդ համակարգն ամեն օր ավելի մշուշոտ դարձրել Հայաստանի ժողովրդավարական ապագան, կեղեքել Հայաստանի քաղաքացուն, բռնաբարել հայ ժողովրդի հույսն ապագայի նկատմամբ։ Դատական համակարգ. Ահա Երվանդ Խունդկարյանի կարիերայի բնօրրանը»,-նշեց Արման Բաբաջանյանը։

Վերջինս ընդգծեց՝ Երվանդ Խունդկարյանը դատական համակարգին մեծագույն վնաս է հասցրել։ Որպես Վճռաբեկ դատարանի նախագահ նրա մասնակցությամբ կայացված մեկ տասնյակից ավելի որոշումներով ՄԻԵԴ-ի կողմից արձանագրված խախտումների հիմքով ՀՀ-ն մոտ 306 հազար եվրոյի փոխհատուցում է տրամադրել։ Արման Բաբաջանյանը նկատեց՝ անչափելի է այն վնասը, որ դատական համակարգի ու պետության հեղինակությանը Երվանդ Խունդկարյանը հասցրել է իր կայացրած մի շարք աղմկահարույց գործերի վերաբերյալ վճիռներով. «Պարոն Խունդկարյան այստեղ դուք չքմեղանում էիք, բայց մենք բոլորս գիտենք, որ դուք հրեշտակ չեք։ Մենք Ձեզ շատ լավ ենք ճանաչում, Ձեր կայացրած դատական ակտերը շատ լավ գիտենք։ Դուք անձնապես Ձեր ավանդն եք ունեցել Հայաստանում խոսքի ազատության ու ժողովրդավարության դեմ ուղղված այն եզակի խայտառակ օպերացիայում՝ Ա1+ հեռուստաընկերության փակման գործում, որի վերաբերյալ մենք չենք դադարելու խոսել։ Լիցենզիայից զրկվելուց հետո Ա1+ հեռուստաընկերությունը հայց էր ներկայացրել ՀՀ տնտեսական դատարան, որտեղ հայցը որպես դատավոր քննել եք Դուք։ Տնտեսական դատարանը Ձեր նախագահությամբ մերժեց հեռուստաընկերության հայտը՝ անհիմն լինելու հիմքով, իսկ 2008 թ.-ի հունիսի 17-ին ՄԻԵԴ-ն այդ որոշումը խախտում ճանաչեց՝ արձանագրելով, որ հեռուստաընկերությանը լիցենզիայի տրամադրումը մերժելը հանդիսացել է միջամտություն Ա1+ հեռուստաընկերության տեղեկատվության և միտք տարածելու ազատությանը»,-նշեց Արման Բաբաջանյանը։

Վերջինս ընդգծեց՝ Երվանդ Խունդկարյանը ՀՀ խայտառակ դատական համակարգի ամենակարկառուն ներկայացուցիչներից մեկն է։

Աղբյուր` Փաստինֆո