Փաստ ինֆո

Կցանկանամ բարոյական կողմը գնահատեք Դատավորների ընդհանուր ժողովում արձանագրված այն խախտումների վերաբերյալ, որոնք հայտնի են։ Ձեր մրցակիցը ևս վիճարկում է այդ ընտրությունների օրինականությունը։ Սա Ձեզ չի՞ կաշկանդում։ Այս մասին հարց ՍԴ դատավորի թեկնածու Երվանդ Խունդկարյանին ուղղեց ԱԺ անկախ պատգամավոր Արման Բաբաջանյանը։

Երվանդ Խունդկարյանն ասաց, որ ՍԴ դատավորի թեկնածուի ընտրության հարցում որևէ անճշտություն, անորոշություն ընտրությունների ժամանակ տեղի չի ունեցել. «Համապատասխան հաշվիչ հանձնաժողովը, ունենալով արդյունքներ, 194 քվեաթերթիկ վերլուծել է, ամփոփել և հայտնել, թե ով է տվյալ քվեարկությանը հաղթող ճանաչվել։ Ինչ վերաբերում է մյուս մրցակցի կողմից հնարավոր վիճարկման երևույթներին, ապա դրան ես որևէ գնահատական չեմ կարող տալ, կողմն ազատ է վիճարկելու և իր ենթադրյալ խախտված իրավունքների վերականգնումն ակնկալելու»,-ասաց Երվանդ Խունդկարյանը։

Վերջինս նշեց, որ Դատավորների ընդհանուր ժողովում ունեցել են բազմաթիվ ընտրություններ, որոնք վերաբերվել են օրենքով սահմանված նոր հանձնաժողովների ընտրությանը. «Մենք ունեցել ենք ԲԴԽ անդամի ընտրություն և ՍԴ դատարանի թեկնածուի ընտրություն և անճշտություն, որ բացահայտվել է, դա տեղի էր ունեցել ԲԴԽ անդամի ընտրության արդյունքների ամփոփման տեսանկյունից, որը հետո հաշվիչ հանձնաժողովի կողմից վերահաշվարկ կատարելու կողմից պարզվել է, որ դա ընդամենը հաշվիչ հանձնաժողովի թերացումն է եղել։ Իրականում քվեատուփում հենց 194 քվեաթերթիկ է եղել, բայց հաշվելու ընթացքում, չգիտես ինչու, նրանց մոտ ստացվել է 204, բայց վերահաշվարկի ժամանակ քվեատուփը փակ վիճակում բացել են ու տեսել, որ իրականում 194 է եղել»,-ասաց Երվանդ Խունդկարյանը։

Արման Բաբաջանյանն էլ նկատեց՝ Երվանդ Խունդկարյանն ընտրությունների վերաբերյալ պատասխանեց ճիշտ այնպես, ինչպես 20 տարի Ռոբերտ Քոչարյանն ու Սերժ Սարգսյանն էին պատասխանում. «Թղթերով ամեն ինչ կարգին է, վերջնարդյունքի վրա ոչ մի ազդեցություն չի ունեցել և նույնիսկ բարոյական վերաբերմունք չեք ուզում հայտնել, որ ցավ եք ապրում՝ այդ ընտրությունների նկատմամբ կա նաև անվստահություն։ Հենց դուք էլ պետք է նախաձեռնեիք նոր ընտրություններ և առանց վախենալու առաջադրվել ու թույլ չտալ, որ այս ստվերը Ձեզ շարունակի հետապնդել, որովհետև այն Ձեզ հետապնդելու է»,-նշեց Արման Բաբաջանյանը։

Աղբյուր` Փաստինֆո