Փաստ ինֆո

Հանրակրթական դպրոցներում յոթամսյա դադարից հետո այսօր՝ սեպտեմբերի 14-ին, մեկնարկել է ուսումնական տարին: Նիկոլ Աղբալյանի անվան N 19 դպրոցում առաջին տարին է, որ աշակերտներին դիմավորում են առանց որևէ միջոցառման: Երեխաները դպրոց են մտնում միայնակ՝ ջերմաչափվելուց և ձեռքերն ախտահանելուց հետո:

Հիշեցնենք, որ ըստ ԿԳՄՍՆ ուղեցույցի՝ դպրոցականները պետք է ջերմաչափվեն, դպրոցներն ախտահանվեն, դասասենյակները օրական 3 անգամ օդափոխվեն, դասերը կանցկացվեն առավելագույնը 20 աշակերտով, հնգօրյայի փոխարեն դասերը կլինեն վեց օր,արգելվում է դասամիջոցներին դուրս գալ դասարանից, ինչպես նաև աշակերտին կանչել գրատախտակի մոտ, դե իսկ դիմակ կրելն էլ պարտադիր է դասերի ողջ ընթացքում: Հատկանշական է, որ չնայած պատճառած անհարմարություններին, երեխաները չեն դժգոհում դիմակ կրելու որոշումից:

-Մի քիչ շոգ էր դիմակով, բայց պիտի դնեմ, որ չվարակվեմ,- ասաց առաջին դասարանի սան՝ Սառա Մանուկյանը: Աշակերտ Գեղամն էլ դժգոհեց, բայց՝ ոչ դիմակ կրելուց, այլ՝ թույլ չեն տվել դպրոց մտցնի իր պայուսակը և ուսուցչուհու համար նախատեսված ծաղկեփունջը:

-Երկու գույնի դիմակ եմ բերել՝ կապույտ ու սև, որ հերթով դնեմ, առաջին անգամ դիմակով եմ լինելու դասին,- պատմեց փոքրիկ Դավիթը:

Փոխարենը դիմակ կրելու պարտադիր պայմանից դժգոհ են աշակերտների ծնողները՝ պնդելով, որ երեխաների դիմակ կրելը ոչ մի կերպ չի կանխելու համավարակի տարածումը, հակառակ արդյունքն է տալու:

-Երեխաներ են, անընդհատ շարժվում են, դիմակը ընկնում է, նրանք էլ այդ նույն դիմակը կրում են, դնում են շուրթերին, այս դեպքում արդեն ուրիշ հիվանդություններ առաջ կգան, չենք կարող անընդհատ վերահսկել, որ ճիշտ կրեն դիմակ,- մեզ հետ զրույցում ասացին ծնողները:

Չնայած սահմանափակումներին՝ ծնողներն ու դպրոցի տնօրինությունը փորձել էին ինչ-որ կերպ նշանավորել առաջին դասարանցիների մուտքը դպրոց, երեխաներն էլ իրենց հերթին դպրոցից դուրս էին գալիս ոգևորված՝ նվերները ձեռքին:

- Դասընկերներից հեռու-հեռու էինք նստած, շատ չենք խոսել, մենակ ուսուցչուհու հետ ենք ծանոթացել, մեզ նվերներ տվեցին՝ գրքեր ու տետրեր,- պատմում էին աշակերտները:

Հիշեցնենք, որ համավարակի տարածումը կանխելու նպատակով դեռևս մարտի 2-ից ուսումնական հաստատություններում հայտարարվել էր արձակուրդ: Առաջին դասարանցիներն այսօր վերջապես այցելեցին դպրոց, իսկ մյուս աշակերտների համար ուսումնական տարին կմեկնարկի վաղը:

Աղբյուր` Փաստինֆո