Փաստ ինֆո

Նախորդ անգամ Ձեզ ընտրեցինք որպես հակակոռուպցիոն հանձնաժողովի անդամ, սակայն նախագահի ընտրություններից հետո որոշեցիք, որ հանձնաժողովում անելիքներ չունեք։ Հնարավո՞ր է այնպես ստացվի, որ քաղաքական մեծամասնությունը Ձեզ ընտրի և գնաք ՍԴ, բայց եթե չընտրվեք ՍԴ նախագահ, կարող եք որոշել, որ ՍԴ-ում անելիք չունեք։ Այս մասին ասաց «Լուսավոր Հայաստան» խմբակցության պատգամավոր Անի Սամսոնյանը՝ դիմելով ՍԴ դատավորի թեկնածու Էդգար Շաթիրյանին։ 

Էդգար Շաթիրյանն ասաց, որ կոռուպցիայի կանխարգելման հանձնաժողովից հեռանալու առնչությամբ իշխող խմբակցության ներկայացուցիչների հետ հանդիպման շրջանակում ներկայացրել է որոշակի պարզաբանումներ. «Հնչել են բազմաթիվ հարցեր, ըստ էության նույնական հարցը տարբեր ձևակերպումներով։ Կարծում եմ՝ այս հարցը բավական շատ է շահարկվում առանձին անձանց կամ շրջանակների կողմից և ըստ էության ես չեմ ուզում որևէ մեկի հասցեին որևէ ավելորդ արտահայտություն անել, բայց կարծես մարդիկ սա դարձրել են խաղաքարտ կամ հաղթաթուղթ և փորձում են այս կամ այն նպատակներով օգտագործել իմ հրաժարականը։ Հրաժարականի պատճառները ես հստակ շարադրել եմ հրաժարականիս տեքստում։ Պատճառներից մեկը եղել է առկա իրողությունների անհամատեղելիությունը պրոֆեսիոնալիզմի և թիմային աշխատանքի մասին պատկերացումներիս հետ և մյուս պատճառը բնավ կոռուպցիայի կանխարգելման նախագահի պաշտոնում չընտրվելս չէր»,-ասաց Էդգար Շաթիրյանը։

Աղբյուր` Փաստինֆո