Փաստ ինֆո

Կոռուպցիայի կանխարգելման հանձնաժողովի եզրակացությանը որևէ կերպ ծանոթ չեմ, չեմ էլ կարող ծանոթ լինել։ Այս մասին քիչ առաջ լրագրողների հետ ճեպազրույցի ժամանակ ասաց ՍԴ դատավորի թեկնածու Երվանդ Խունդկարյանը։

«Ըստ օրենքի՝ եզրակացությունը գաղտնի է, և դա տրամադրվում է միայն ընտրություն կատարող անձանց։ Ես ընդամենը կարող եմ տեղեկացված լինել Կոռուպցիայի կանխարգելման հանձնաժողովի ենթադրյալ կարծիքի մասին միայն այն կտորից, որը տեսել եմ մամուլում։ Մամուլում հայտնված տեղեկատվությունն այնպիսին է, որ ինձ մոտ խիստ կասկածներ է առաջացնում, թե արդյոք կոռուպցիայի կանխարգելման հանձնաժողովի կողմից կարող էր նման որակի վերլուծություններ լինել։ Ես ԱԺ ամբիոնից ներկայացրեցի մասնավորապես մեկ օրինակ՝ «Մելտեքս» ՍՊը-ի գործին վերաբերող։ Ինձ մոտ տարակուսանք էր առաջանում՝ արդյոք այն մարդիկ, ովքեր դատավոր Խունդկարյանին մեղադրում են խախտումներ թույլ տալու և հեռուստաընկերությունը փակելու մեջ, կարդացե՞լ են ՄԻԵԴ-ի համապատասխան վճիռը, թե ոչ։ ՄԻԵԴ-ի համապատասխան վճիռը վերաբերվել է հետևյալին, որ արդար դատաքննության իրավունքի որևէ խախտում դատավոր Խունդկարյանի գործով տեղի չի ունեցել։ Ընդահակառակը դատավոր Խունդկարյանը, որն այդ ժամանակահատվածում տնտեսական դատարանում էր աշխատել, ստեղծել է համապատասխան միջավայր, կողմերի համար հավասար մրցակցության համար զենքերի հավասարություն է ստեղծել»,-ասաց Երվանդ Խունդկարյանը։

Լրագրողի դիտարկմանը, որ ՄԻԵԴ-ի որոշմամբ արձանագրվել է, որ հեռուստաընկերության լիցենզիայի տրամադրումը մերժելը հանդիսացել է միջամտություն հեռուստատեսության, տեղեկատվության և գաղափարներ տարածելու ազատությանը, որն էլ Կոռուպցիայի կանխարգելման հանձնաժողովի եզրակացությունն է, Երվանդ Խունդկարյանն արձագանքեց. «Իսկ Ձեզ հասանելի դարձե՞լ է այդ եզրակացությունը։ Որտեղից է հասանելի դարձել»,-հարցրեց Երվանդ Խունդկարյանը։

Հարցին՝ համաձայն չէ՞ հանձնաժողովի կարծիքին, Խունդկարյանն ասաց, որ հանձնաժողովի կարծիքը չի կարդացել, իսկ այն ինչ արձանագրվել է ՄԻԵԴ-ի վճռում դատավորի գործողությունների մասով որևէ բացթողում արձանագրված չէ. «Հակառակը ֆիքսվել է, որ արդար դատաքննության իրավունքի որևէ խախտում տեղի չի ունեցել»,-ասաց Երվանդ Խունդկարյանը։

Դիտարկմանը, որ այս եզրակացությունից հետո ՍԴ դատավորի պաշտոնում իր ընտրվելը հարցականի տակ է դնում, Երվանդ Խունդկարյանն ասաց. «Չեմ կարող գնահատականը տալ՝ ինչպես կանդրադառնա, որովհետև այդ կարծիքն ընդամենը պատգամավորներին տրված կարծիք է և դա պետք է ուղղորդի պատգամավորներին։ Եթե պատգամավորները կգտնեն, որ դա խոչընդոտ է ընտրությանը, ընտրությանը նրանցն է»,-ասաց Երվանդ Խունդկարյանը։

Աղբյուր` Փաստինֆո