Փաստ ինֆո

Ինչպե՞ս է ստացվել, որ ապրելով Երևանում, Ձեր որդին ծառայել է Երևանում։ Այս մասին ՍԴ դատավորի թեկնածու Երվանդ Խունդկարյանին հարցրեց ԱԺ «Իմ քայլը» խմբակցության պատգամավոր Թագուհի Թովմասյանը։

«Ձեր որդիներից մեկը ծառայությունն անցկացրել է Երևանում, մյուս որդին էլ ինձ հասած տեղեկություններով որ այս պահին ծառայում է արտոնյալ պայմաններում և դիրքեր չի բարձրանում այն պարագայում, երբ ինքներդ Մեղրիում եք ծառայել»,-հետաքրքրվեց պատգամավորը։
Երվանդ Խունդկարյանը նշեց՝ այն անձինք, որոնք իրեն ճանաչում են, գիտեն նաև իր բնավորությունը և վարքագիծը նաև իր ընտանիքի անդամների հարցում.

«Իմ երկու որդիներն էլ, ավագը ծառայել է ազգային բանակում և ծառայությունն անցկացրել է պատվո պահակախմբի համապատասխան ստորաբաժանումում։ Երկրորդ որդիս ներկայումս գտնվում է ժամկետային զինվորական ծառայության մեջ և այն անցկացնում է ՀՀ տարածքում տեղակայված զորամասերից մեկում։ Ծառայությունն իրականացնում է նույն մեթոդներով և նույն սկզբունքներով, ինչ բոլոր զինվորները։ Արդեն 1.5 ամիս է իմ որդին գտնվում է դիրքերում։ Այնպես որ այն տեղեկատվությունը, որն ունեք, իրականությանը չի համապատասխանում։ Թե ինչու է X կամ Y պարագայում, Պաշտպանության նախարարության որոշմամբ զինվորը հայտնվել այս կամ այն զորամասում, ես չեմ, որ այդ հարցի պատասխանը պետք է տամ և նման ուղղությամբ որևէ միջոց չեմ ձեռնարկել։ Իմ ներկայումս ծառայող որդին որևէ զինվորի նկատմամբ որևէ արտոնություն չի ունեցել»,-ասաց Խունդկարյանը՝ ընդգծելով, որ ավագ որդու ծառայության վայրի որոշման առումով չի ունեցել և ոչ էլ իրեն թույլ կտար այդ հարցով որևէ մեկին դիմելու։

Աղբյուր` Փաստինֆո