Փաստ ինֆո

2015 թ.-ից ի վեր հայտարարագրել եք անշարժ գույքի ձեռքբերման և օտարման 6 գործարք, իսկ անշարժ գույքի կադաստրի պետական կոմիտեից ստացված տեղեկատվության համաձայն 2007 թ.-ից ի վեր իրականացրել եք անշարժ գույքի ձեռքբերման և օտարման 24 գործարք։ Ներկայումս հաշվառված եք 2017թ.-ին օտարված բնակարանում, իսկ բնակության հասցեում գտնվող անշարժ գույքը Ձեր սեփականությունը չէ։ Ինչպես նկատում եք՝ կան անհամապատասխանություններ։ Այս մասին այսօր ԱԺ-ում ասաց «Լուսավոր Հայաստան» խմբակցության պատգամավոր Անի Սամսոնյանը՝ դիմելով ՍԴ դատավորի թեկնածու Էդգար Շաթիրյանին։ 

Էդգար Շաթիրյանը նշեց՝ ծանոթ չէ բարեվարքության վերաբերյալ եզրակացության բովանդակությանը, բայց ուրախ է, որ եզրակացությունից որոշ դրույթներ բարձրաձայնեց պատգամավորը. «Հղում կատարեցիք եզրակացությանն առ այն, որ 2007 թ.-ից առ այսօր անշարժ գույքի առուվաճառքի 24 գործարք է տեղի ունեցել։ Այդ տեղեկատվությունը չեմ ուզում ասել՝ չի համապատասխանում իրականությանը, միգուցե կադաստրի կոմիտեի բազայում առկա տվզյալների հետ կապված տեխնիկական խնդիր կա, կամ եթե հարցումով են ստացել այս ինֆորմացիան, այս դեպքում ամենայն վստահությամբ կարձանագրեմ, որ նման բան չի եղել։ Անշարժ գույքի առուվաճառքի հետ կապված բավական մեծաթիվ գործարքներ եմ արել և որպես պաշտոնյա ժամանակահատվածում՝ սկսած 2015 թ.-ից մինչև 2019 թվականն այդ գործարքների վերաբերյալ տեղեկություններն արտացոլված են իմ համապատասխան հայտարարագրերի եկամուտների վերաբերյալ բաժիններում։ Այս առումով միանշանակ հանգիստ եմ։ Կա՛մ թյուրիմացություն է, կա՛մ տեխնիկական է, կա՛մ բազայում առկա տվյալների անհամապատասխանություն է, բայց ինձ հետ կապված խնդիր միանշանակ չկա»,-ասաց Էդգար Շաթիրյանը։

Անդրադառնալով այն դիտարկմանը, որ 2017-2020 թթ. բանկային հաշիվների շրջանառությունը երեք անգամ գերազանցում է եկամուտներին, ՍԴ դատավորի թեկնածուն ասաց. «Խնդիրն այստեղ հետևյալն է. եթե անձն օտարում է անշարժ կամ շարժական գույք, գույքի օտարումից ստացված եկամուտն արտացոլվում է հայտարարագրերի եկամուտների բաժնում, ինչն արել եմ։ Սրան զուգահեռ որպես եկամուտ ստացված գումարը նույն հաշվետու ժամանակահատվածում մի քանի բանկերում ներդրել եմ որպես ավանդ։ Հիմա հնարավոր է, որ 30 կամ 40 հազար դոլարը տվյալ տարում ներդրել եմ որպես ավանդ, այնուհետև հանել եմ որպես ավանդ դրված գումարը և մեկ ամիս հետո նույն գումարը կրկին եմ ներդրել։ Հասկանալի է, որ այս գումարների մեխանիկական հանրագումարի արդյունքում, ինչպես նշված է եզրակացության մեջ, շրջանառությունը պետք է գերազանցեր եկամուտներս»,-ասաց Էդգար Շաթիրյանը՝ ընդգծելով, որ իր բարեխղճության մասով լիովին վստահ է։

Աղբյուր` Փաստինֆո