Փաստ ինֆո

Պարտադիր զինվորական ծառայությունից խոսում են այն մարդիկ ովքեր չեն ծառայել բանակում, ովքեր փաստաթղթեր են կեղծել, համապատասխան քրեական հետապնդման են ենթարկվել, բանտ են նստել: Նրանք ամեն գնով խուսափել են բանակից եւ կարծում եմ, որ իրենց կողմից ուղղակի բարոյական չէ նման նախագիծ բերելը: Այս մասին «Փաստինֆո»-ի հետ զրույցում ասաց «Լուսավոր Հայաստան» խմբակցության անդամ Գեւորգ Գորգիսյանը՝ անդրադառնալով ԱԺ պատգամավոր Արման Բաբաջանյանի եւ «Իմ քայլը» խմբակցության պատգամավորներ Մխիթար Հայրապետյանի եւ Անդրանիկ Քոչարյանի հեղինակած նախագծին։ Ըստ օրինագծի՝ 27 տարին լրացած այն ՀՀ քաղաքացիները, որոնք չեն անցել պարտադիր զինվորական ծառայություն և գտնվում են քրեական հետախուզման մեջ, պայմանագրային զինվորական ծառայողի երկու տարվա աշխատավարձը վճարելու դեպքում կազատվեն քրեական հետապնդումից։

«Նախագիծն ունի շատ խնդիրներ: Կրկնում են Վիգեն Սարգսյանի սխալը՝ կարծելով, թե բոլոր սփյուռքահայերը միլիոնատեր են։ Նախնական հաշվարկներով 13-15 հազար դոլարի է հասնելու այն գումարը, որ ուզում են քաղաքացուց՝ քրեական պատասխանատվությունից ազատելու համար: Եթե մարդիկ չեն ուզում ծառայել, նշանակում է բանակում խնդիր կա: 10 հազարից ավել ՀՀ քաղաքացի հիմա այս հոդվածով քրեական հետապնդման մեջ է եւ նրանք որեւէ կերպ էլ չեն վերադառնալու։ Որպեսզի քաղաքացիները չփախնեն բանակից, անհրաժեշտ է նախ բանակում բարեփոխումներ անել:

Բանակի նկատմամբ վերաբերմունքը պետք է փոխվի, ծնողները պիտի վստահ լինեն, որ իրենց որդիները գնում են հայրենիքին ծառայելու, սխրանքներ գործելու, նրանց վտանգ չի սպառնում, որ այնտեղ երեխաները հոգեբանական վնասներ կրած հետ չեն վերադառնալու»,- նկատեց պատգամավորը՝ շեշտելով՝ օրինագիծը չի նպաստելու բանակում առկա այս հարցերի լուծմանը։ Գորգիսյանի խոսքով՝ նախագիծը կարող էր դեմոգրաֆիական խնդիրներ լուծել, եթե չլինեին առկա սահմանափակումներն ու խնդիրները։ Ասում է՝ պատգամավորների հռչակած նպատակը, իհարկե, լավ է, բայց այս իշխանությունները միշտ լավ նպատակներն ուղղակի հայտարարում են, հետո դրա տակ անում են անհասկանալի բաներ․ «Նույնը լինելու է այս նախաձեռնության պարագայում։ Հատկապես այս պատգամավորների դեպքում ես նաեւ բարոյականության խնդիր եմ տեսնում»:

Եթե պարտադիր զինվորական ծառայությունից խուսափելը ՀՀ օրենսդրությամբ քրեորեն պատժելի է, կարելի՞ է օրինականացնել պատժից գումարով ազատելը, հարցին ի պատասխան Գորգիսյանն ասաց․ «Արտասահմանում ապրող բոլոր ՀՀ քաղաքացիները չէ, որ դասալիք են։ Նրանց թվում կան մարդիկ ովքեր մեկնել են արտասահման սովորելու եւ հիմա չեն կարողանում վերադառնալ, որովհետեւ, եթե գան գործող օրենքով քրեական պատասխանատվության կենթարկվեն: Այն տեսքով, որով բերել են նախագիծը, հիշյալ քաղաքացիները չեն կարող օգտվել։ Նախ` գումարն է շատ բարձր, Սահմանադրության հետ կապված խնդիրներ կան։ Բացի այդ, սահմանված չէ, թե կոնկրետ ինչ գումարի մասին է խոսքը, նշվում է միայն՝ պայմանագրային զինծառայողի աշխատավարձի եւ հավելավճարի չափով: Ունենք հայրենակիցներ, ովքեր Հայաստանից հեռացել են ինչ-ինչ պատճառներով, հիմա ուզում են վերադառնալ։ Մեզ համար էլ է լավ, եթե գան եւ իրենց գիտելիքներն ու հմտությունները ծառայեցնեն Հայաստանի Հանրապետությանը։ Մենք պետք է դուռ բացենք նրանց համար՝ հետ վերադարձի: Իսկ այս նախագիծը վստահ եմ, որ այդ նպատակին չի ծառայի»,-կարծում է Գորգիսյանը։

Խոսելով գումարով եւ կեղծ փաստաթղթերով զինվորական պարտադիր ծառայությունից խուսափած անձանց մասին՝ Գորգիսյանը շեշտեց, որ նրանք չպետք է ազատվեն պատասխանատվությունից։ «Այն անձինք, ովքեր գումարով ազատվել են, կեղծ փաստաթղթեր են ներկայացրել, պետք է նրանց նկատմամբ քրեական գործեր հարուցվի: Պատասխանատվությունից ազատումը արդարացում ունի միայն 1 դեպքում, եթե այդ մարդը գտնվում է արտերկրում եւ մենք ուզում ենք նրան բերել Հայաստան, որպեսզի այստեղ ընտանիք կազմի, աշխատի, արարի: Իսկ, եթե նախագիծը չի ծառայելու այդ նպատակին, ուրեմն այն ոչ միայն անիմաստ է, այլեւ վտանգավոր»,-հավելեց պատգամավորը։

Աղբյուր` Փաստինֆո