Փաստ ինֆո

ԱԺ «Լուսավոր Հայաստան» խմբակցությունը չի մասնակցի ՍԴ դատավորի ընտրության քվեարկությանը։ Այս մասին ԱԺ-ում ասաց խմբակցության պատգամավոր Տարոն Սիմոնյանը։

«Հակաիրավական գործընթացը, որն այս դահլիճում տեղի է ունեցել սահմանադրության փոփոխության համատեքստում, շարունակվում է, և այս ընտրությունը նաև այդ հակաիրավական գործընթացի հետևանքն է։ Հետևաբար որքան էլ մեծ ցանկություն ունենամ քվեարկելու հատկապես իմ դասախոսի և մյուս թեկնածուների օգտին, դրա հնարավորությունը չունեմ, որովհետև ինչպես ճշմարտությունն է ավելի կարևոր, այնպես էլ սահմանադրությունն է ՀՀ քաղաքացու համար ավելի մեծարժեք, քան մնացած արժեքներն իրավական բնագավառում»,-ասաց Տարոն Սիմոնյանը։

Վերջինս նկատեց՝ հանրության մոտ մի ընկալում կա, որ իշխանության այսօրվա թիմը ոչ այդքան արհեստավարժ է կառավարման կամ այլ բնագավառներում. «Ուզում եմ ասել, որ իշխանության այս թիմը շատ պրոֆեսիոնալ է հատկապես չեղած տեղը խնդիրներ առաջացնելու և այդ խնդիրները քաջաբար հաղթահարելու բնագավառում։ Կամ եղած խնդիրներն այնպես բարդացնելու, որ այլևս որևէ հնարավոր տարբերակ չլինի լուծում գտնելու ուղղությամբ։ Մենք դատական համակարգում արդեն իսկ մեծ քանակությամբ խնդիրներ ունեինք, ՍԴ, Վճռաբեկ դատարան, Վերաքննիչ, Աառաջին ատյանի դատարաններ։ Չկա մի դատական ատյան, որ հարյուրավոր խդնիրներ չլինի՝ սկսած օբյեկտիվ խնդիրներից վերջացրած սուբյեկտիվ խնդիրներով։ Փոխանակ մենք զբաղվենք այս խնդիրներով, մենք այս խնդիրները բարդացնում ենք, մի հատ էլ հակասահմանադրական գործընթաց ենք կազմակերպում, երկրի մայր օրենքի խախտմամբ փոփոխության ենք ենթարկում և դրա հիման վրա շարունակում ենք իբր բարեփոխումները։ Եթե ծառի արմատի մեջ թույն եք սրսկում, նա հնարավորություն չունի լավ պտուղ տալ։ Մենք պետք է զբաղվեինք այդ ծառը մշակելով, ոչ թե թունավորելով։ Այսօր փաստորեն մենք զբաղվում ենք արդեն իսկ թունավորված ծառի պտուղների գեղեցիկ ներկայացմամբ։ Հնարավոր չի լինելու։ Մինչև բոլոր գործընթացներն իրավական ճիշտ ճանապարհով չկազմակերպվի, խնդիրները չեն լուծվելու»,-ասաց Տարոն Սիմոնյանը։

Աղբյուր` Փաստինֆո