Փաստ ինֆո

Արաբկիր համայնքի նախկին թաղապետ Հովհաննես Շահինյանը հրավիրվել էր ԱԱԾ՝ հարցաքննության։ Շահինյանը լրագրողներին պատմեց, որ հարցաքննության հրավերը վերաբերում է 2005-2007թթ ընթացքում իր պաշտոնավարման ժամականահատվածում որոշակի փաստաթղթերին, բայց, քանի որ անցել է վաղեմության ժամկետը՝ իրեն առաջարկել են նաև քննարկել դա և գնալ կարճման։

Շահինյանի փոխանցմամբ՝ մերժել է գործը կարճելու նման տարբերակը և խնդրել, պահանջել, որ հարուցվի քրեական գործ, կատարվի քննություն և մեղավորները պատասխան տան։ Շահինյանի խոսքով՝ հարցաքննությունը կապ ունի իր հասարակական-քաղաքական գործունեության հետ, քանի որ այն, ինչի մասին խոսվում է, վերաբերում է 2005-2007թթ, այսինքն՝ 13 տարի առաջ տեղի ունեցած ենթադրյալ դեպքերի։

«Բայց խնդիրն այստեղ այն չէ, որ մենք ուզում ենք օգտվել վաղեմությունից, հակառակը՝ մենք խնդրում ենք ու ցանկանում ենք, որ քննվեն այդ գործերը, և, եթե մեղավոր կլինեմ ես կամ մեկ ուրիշը, ապա պետք է պատասխան տան»,- ասաց Շահինյանը։

«Ինձ համար փաստ է, որ ես հետապնդվում եմ իմ հասարակական-քաղաքական գործունեության համար, քանի որ 2019թ ՀՔԾ-ում քննություն է եղել «Մարտի 1»-ի հետ կապված իմ դերակատարման մասին, բայց պարզվեց, որ 2008թ փետրվարի 25-ին ես ծանր վիրահատություն եմ տարել, վերակենդանացման բաժանմունքից նոր էի տեղափոխվել».- ասաց Շահինյանը։

Շահինյանը նշեց, որ ներսում իրեն ասել են, որ հարցաքննությունը վերաբերում է միայն իր պաշտոնավարմանը և քանի որ կա վաղեմություն, կարող են պայմանավորվել և գնալ գործի կարճման։ Վերջինս ընդգծեց, որ պատասխան կտան այն մարդիկ, որոնք այս պատվերն իջեցրել են իրավապահ մարմիններին՝ իրեն ձայնազրկելու կամ մեկուսացնելու համար։

«Փաշինյան Նիկոլ, դա քեզ մոտ չի ստացվելու, այ տղա»,- ասաց նա։

Աղբյուր` Փաստինֆո