Փաստ ինֆո

ՀՀ երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանն առաջադրված մեղադրանքը չի ընդունում։ Այս մասին «Փաստինֆո»-ի հետ զրույցում ասաց պաշտպան Մհեր Հակոբյանը։

Ինչպես ավելի վաղ տեղեկացրել ենք՝ Վաչագան Ղազարյանին նոր մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով։ Ըստ մեղադրանքի՝ Ղազարյանը, պետական միջոցները սեփական ընտանիքի շահերին ծառայեցնելու և այդ ուղղությամբ սեփական միջոցներից լրացուցիչ ծախս չկատարելու անձնական շահագրգռվածությունից ելնելով, պաշտոնեական դիրքն օգտագործել է ծառայության շահերին հակառակ, այն է` ՀՀ ԱԱԾ պետական պահպանության ծառայության ավտոտնտեսության վարորդ Ս. Ա.-ին առաջարկել է պետական միջոցներից վարձատրություն ստանալով հանդերձ աշխատել որպես իր կնոջ և տան վարորդ: Ավելին՝ ըստ ՀՔԾ հաղորդագրության՝ Ս. Ա.-ն 2015-2018 թվականների ընթացքում վարորդի ծառայություններ է մատուցել Վ. Ղազարյանի կնոջը, ինչով պայմանավորված՝ հիշյալ ժամանակահատվածում ՀՀ ԱԱԾ պետական պահպանության ծառայության ավտոտնտեսությունում առհասարակ ծառայության չի ներկայացել և ծառայողական որևէ պարտականություն չի կատարել: Չնայած դրան` Պետական պահպանության ծառայությանը հատկացված միջոցներից այդ ընթացքում Ս. Ա.-ին որպես աշխատավարձ, պարգևատրում և իրային բավարարում փաստացի վճարվել է առանձնապես խոշոր չափի՝ 9.340.677 ՀՀ դրամ, որը Վ. Ղազարյանի կողմից ամբողջությամբ վերականգնվել է:

Պաշտպան Մհեր Հակոբյանը «Փաստինֆո»-ի հետ զրույցում տեղեկացրեց, որ Ղազարյանը ցուցմունք է տվել ու հերքել մեղադրանքում նշված հանգամանքները։ Հակոբյանը պնդում է, որ ներկայացված մեղադրանքը բացարձակ սուտ է, իրականության հետ որևէ աղերս չունի և մեղադրանքում առկա մի շարք ձևակերպումներ նույնիսկ ծիծաղելի են։ Պաշտպանական կողմի համար հատկապես ծիծաղելի են այն պնդումները, թե վարորդը պետական միջոց է, Ղազարյանն էլ ցանկացել է օգտվել այդ պետական միջոցից։ Նրա փոխանցմամբ՝ ՊՊԾ ծառայողը Ղազարյանի ընտանիքի համար վարորդ չի եղել, կցված է եղել Վաչագան Ղազարյանին և կատարել նրա հանձնարարությունները, իսկ, եթե օրվա ընթացքում էլ հանձնարարել է ընտանիքի անդամին ինչ- որ տեղ տեղափոխել կամ ինչ- որ հանձնարարություն տվել, դրանով ընտանեկան վարորդ չեն դառնում։
Փաստաբանը գտնում է, որ, եթե մինչև մեղադրանք առաջադրելը ՀՔԾ-ն լրիվ քննություն կատարեր, կտեսներ, որ անձն իր ծառայությունը, աշխատանքային պարտականությունները կատարել էր։

«Եթե տան վարորդ է եղել, ինչպե՞ս է եղել, որ մտել է կառավարական առանձնատուն, Բաղրամյան 28 և,եթե տան վարորդ է եղել, ինչու է մտել այդտեղ, դուրս եկել»,- նշեց փաստաբանը։

Ինչ վերաբերում է գումարի վճարմանը, Հակոբյանը նշեց, որ արդեն երկու տարի է, ինչ Վաչագան Ղազարյանին տանում-բերում են և գումարը մուծել են, որ իրեն հանգիստ թողնեն և միջնորդել՝ համաներում կիրառելու համար։ «Մոտավոր 60 տարեկան մարդ է, արդեն հոգնել է անընդհատ քննչական գնալ-գալուց՝ սարքած գործերով։ Դրա համար է վճարել և ցուցմունքի մեջ այդպես էլ գրել է »,- ասաց փաստաբանը՝ նշելով, որ Վաչագան Ղազարյանը մասնակցել է Արցախի և Հայաստանի սահմանների պաշտպանությանը և այդ հիմքով պետք է նրա նկատմամբ կիրառվի համաներում և դադարեցվի քրեական հետապնդումը։ Նրա փոխանցմամբ՝ առաջիկայում արդեն իսկ պետք է դադարեցվի քրեական հետապնդումը և վարույթն իրականացնող մարմնի կողմից կայացված որոշումից պարզ կլինի՝ կա արդյոք միտում Վաչագան Ղազարյանի դեմ, թե օբյեկտիվ քննություն է իրականացվում։

Անդրադառնալով Ղազարյանի մասնակցությամբ քննչական գործողություններին՝ Հակոբյանը նշեց, որ մեկ անգամ խափանման միջոց է ընտրվել, մեկ անգամ էլ մեղադրանք են առաջադրվել։ Իսկ թե կա արդյոք Ղազարյանի դեմ ցուցմունք, թե ոչ՝ պաշտպանը չգիտի, քանի որ գործի նյութերին դեռ չի տիրապետում, սակայն նշեց, որ հոդվածը, որով մեղադրանք է առաջադրվել և ՀՀ քրեական դատավարության օրենսգրքի համաձայն՝ մեղադրանք առաջադրվում է բավարար ապացույցների համակցության դեպքում, ինչը նշանակում է, որ վարույթն իրականացնող մարմինն այդ ամենը հաստատված է համար։

Հիշեցնենք, որ Վաչագան Ղազարյանի ու նրա կնոջ նկատմամբ նախկինում հարուցվել էին քրեական գործեր՝ ապօրինի հարստանալու, դրամական միջոցների իրական չափի մասին հայտարարագրման ենթակա տվյալները թաքցնելու, հարկերի վճարումից չարամտորեն խուսափելու դեպքերի առթիվ, բայց գործերն այդպես էլ դատարան չհասան եւ նախաքննության փուլում կարճվեցին՝ Վ.Ղազարյանի ու նրա կնոջ նկատմամբ դադարեցնելով քրեական հետապնդումը։

Հեղինակ՝ Իզաբել Սահակյան

Աղբյուր` Փաստինֆո