Փաստ ինֆո

Կոտայքի մարզում ռեստորանային համալիրներից մեկում տեղի ունեցած խնջույքին հաջորդել է գումարային հարցի շուրջ վիճաբանությունն ու ավարտվել սպանությամբ։ «Փաստինֆո»-ի հաղորդմամբ՝ ճակատագրական դարձած վիճաբանությունը տեղի է ունեցել դեռևս 2018թ նոյեմբերի 1-ին՝ ժամը 17։00-ի սահմաններում, երբ ռեստորանային համալիրում կայացած խնջույքից հետո Կոտայքի մարզի 33-ամյա բնակչին մոտեցել է մի տղամարդ և գումար պահանջել, ինչի շուրջ առաջացած վիճաբանության ընթացքում նույն համալիրի ավտոկայանատեղիում առնվազն երկու անգամ ձեռքերով և ոտքերով 33-ամյա տղամարդը հարվածել է իրենից գումար պահանջող տղամարդու աչքին և քթին, որից հետո վերջինիս և մեկ այլ տղամարդու հետ միասին «Մերսեդես Բենց» մակնիշի ավտոմեքենայով ուղևորվել են Գառնի գյուղի ուղղությամբ, որի ընթացքում ավտոմեքենայի մեջ վիճաբանությունը շարունակվել է։

Հասնելով Գառնի գյուղում շինություններից մեկի մոտ՝ 33-ամյա տղամարդը կտրուկ կայանել է ավտոմեքենան ու ձեռքերով, ոտքերով հարվածներ է հասցրել իրենից գումար պահանջող տղամարդու մարմնի կենսական կարևոր նշանակություն ունեցող հատվածին՝գլխի տարբեր մասերին։ Այնուհետեւ նրան տեղափոխել են «Գառնի առողջության կենտրոն», որտեղ խեղաթյուրելով դեպքի իրական հանգամանքները 33-ամյա տղամարդը կենտրոնի աշխատակիցներին հայտնել է, թե, իբր, տուժող Ռազմիկ Ներսիսյանը թունավորվել է մեծ քանակությամբ ալկոհոլ օգտագործելուց և կորցրել է գիտակցությունը, իսկ բուժանձնակազմի կողմից փսխած զանգվածի մեջ հիշյալ թարմ արյուն նկատելուց հետո վերջինս կրկին իրականությանը չհամապատասխանող տեղեկություններ է հայտնել առ այն, թե իբր վերջինս ընկել է աստիճաններից, սակայն վերջինս հիշյալ կենտրոնի աշխատակիցների նախաձեռնությամբ անհրաժեշտ բժշկական օգնություն ցուցաբերելու նպատակով տեղափոխվել է «Սուրբ Գրիգոր Լուսավորիչ բժշկական կենտրոն», այդուհանդերձ ստացած մարմնական վնասվածքների հետևանքով 2018 թվականի նոյեմբերի 11-ին, գիտակցության չգալով, մահացել է:

Դեպքի առթիվ հարուցվել է քրեական գործ, որի շրջանակներում 33 տարեկան տղամարդուն մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասի՝ սպանության հատկանիշներով։ Նրա նկատմամբ որպես խափանման միջոց է ընտրվել կալանավորումը։

Նախաքննության ավարտից հետո դատախազությունը հաստատել է մեղադրական եզրակացությունը և գործն ուղարկել դատարան։

Աղբյուր` Փաստինֆո