Փաստ ինֆո

Տափերականում ապրիլին տեղի ունեցած սպանության գործով կալանավորված Ալեն Պետրոսյանի հարազատներն այսօր ՀՀ գլխավոր դատախազության շենքի դիմաց բողոքի ակցիա են իրականացրել՝ պահանջելով ազատ արձակել Պետրոսյանին։ Նրանք համոզված են՝ Պետրոսյանի կալանքը և քրեական գործն ընդհանրապես անօրինական է։ Պետրոսյանի պաշտպան Արման Արզումանյանը լրագրողների հետ զրույցում ասաց, որ քրեական գործով սկզբնական շրջանում մի քանի վիճահարույց ապացույցներ են ձեռք բերվել, որի հիման վրա Պետրոսյանը նախ ձերբակալվել, ապա կալանավորվել է, մինչդեռ, գործի զարգացումը ցույց է տվել, որ Պետրոսյանը որևէ կապ չունի սպանության հետ, մասնավորապես, ոստիկանություն է ներկայացել սպանություն իրական կատարողը, հանձնել գործիքը, սակայն գործը չի շարժվում։

«Այս ծայրահեղ միջոցներն արդարությունը վերականգնելու ևս մի եղանակ է։ Մենք արդեն ոչ մի ելք չենք տեսնում՝ խնդրի լուծված լինելու, խնդիրները բարձրաձայնելու, ստիպված դիմում ենք այս ծայրահեղ միջոցին»,- ասաց Արզումանյանը՝ նշելով, որ վարույթն իրականացնող մարմնի վերաբերմունքը հիմնված է գործով ձեռք բերված ապացույցների հիման վրա, այլ՝ անհասկանալի դատողությունների։

Պաշտպանը հայտնեց, որ Պետրոսյանը հացադուլ էր հայտարարել, սակայն պատգամավորներից մեկի հետ հանդիպումից հետո դադարեցրել է հացադուլը։

Լրագրողների հետ ճեպազրույցից հետո փաստաբանին և ակցիայի և երկու մասնակցի հրավիրեցին դատախազություն՝ ՀՀ գլխավոր դատախազի տեղակալ Արմեն Աֆանդյանի հետ հանդիպման։ Փաստաբանը, Դատախազությունից դուրս գալով, լրագրողների հետ զրույցում ասաց, որ իրենց հայտնի տեղեկությունները փոխանցել են պարոն Աֆանդյանին և հույս հայտնեց, որ ինչպես խոստացել են, մոտ օրերս որևէ կերպ կհանգուցալուծվի, գործի վարույթում որոշակի հստակություն կմտցվի։ Փաստաբանը կարծում է, որ կիրականացվեն կամ օպերատիվ-հետախուզական, կամ քննչական, կամ էլ դատավարական գործողություններ։ Արզումանյանը նշեց, որ հիմնական պահանջն այն է, որ քննարկվի Պետրոսյանի ազատության հարցը, նա ազատ արձակվի կալանքից, իսկ գործի կարճման մասին դեռևս վաղ է խոսել, թող քննություն իրականացվի, չի բացառվում, որ հետագայում արդարացում լինի։

Տափերականցիներն այսօր դադարեցրել են բողոքի ակցիան։

Աղբյուր` Փաստինֆո