Փաստ ինֆո

Ապրիլին Տափերականում տեղի ունեցած 43-ամյա տղամարդու սպանության գործով մեղադրյալ Ալեն Պետրոսյանը շուրջ վեց ամիս է, ինչ կալանավորված է։ Նշենք, որ խոսքը գնում է 2020թ ապրիլի 12-ին Արարատի մարզի Տափերական համայնքում տեղի ունեցած սպանության մասին։

Ինչպես տեղեկացրել ենք՝ Արտաշատ քաղաքի բնակարաններից մեկից «ձախ ազդրի վերին երրորդականի, ձախ սրունքի վերին երրորդականի հրազենային վերք» ախտորոշմամբ շտապօգնության խմբի կողմից «Մասիսի բժշկական կենտրոն» ՓԲԸ էր տեղափոխել 43-ամյա տղամարդը, որը շտապօգնության ավտոմեքենայի մեջ մահացել էր՝ արնահոսությունից: ՔԿ-ն հայտնել էր, որ դեպքի առթիվ հարուցված քրեական գործով իրականացված քննչական գործողությունների արդյունքում պարզվել է, որ 43-ամյա տղամարդը նշված մարմնական վնասվածքն ստացել է Տափերական համայնքի մշակույթի տան դիմաց տեղի ունեցած ծեծկռտուքի ժամանակ՝ Արարատի մարզի 25-ամյա բնակչի կողմից: Երիտասարդին մեղադրանք է առաջադրվել ՀՀ քրեական օրենսգրքի 104-րդ հոդվածի (սպանություն) 1-ին մասով և ՀՀ քրեական օրենսգրքի 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասով։

Երիտասարդի՝ Ալեն Պետրոսյանի պաշտպան Արման Արզումանյանը «Փաստինֆո»-ի հետ զրույցում ասաց, որ դեպքի օրը՝ երեկոյան ժամը 22։30-ի սահմաններում վիճաբանություն է տեղի ունեցել Տափերականի և հարակից այլ գյուղերի, ինչպես նաև Արտաշատ քաղաքի բնակիչների մասնակցությամբ, որի ընթացքում ազդրի և սրունքի հատվածում ստացած վնասվածքներից հետո ուշ բուժօգնության դիմելու պատճառով արնաքամ լինելուց մահացել է Արման Քրդյանը։

Փաստաբանի խոսքով՝ դեպքից հետո ոստիկաններն այցելել են Պետրոսյանի տուն, հաջորդ օրն առավոտյան կրկին այցելել են, նկարել, որից 30-40 րոպե անց նրան բերման են ենթարկել մարզային քննչական վարչություն։ Մինչ փաստաբանը կհանդիպեր Ալեն Պետրոսյանին՝ նրան արդեն ձերբակալել էին, կատարվել մի շարք քննչական գործողություններ, հարցաքննել, սպանվածի՝ Արման Քրդյանի որդու՝ Գեղամ Քրդյանի մասնակցությամբ ճանաչում կատարել։ Փաստաբանի խոսքով՝ Քրդյանը երկու անգամ ցուցմունք է տվել, առաջին անգամ ասել է, որ երիտասարդը եղել է մորուքով, իսկ երկրորդ ցուցմունքում մանրամասն նկարագրել է Ալեն Պետրոսյանին, ըստ փաստաբանի, Քրդյանին մինչ այդ ցույց էին տվել նկարը, իսկ արդեն ճանաչման ժամանակ Ալեն Պետրոսյանից բացի ներկայացվել են ևս երեք երիտասարդ, որոնք եղել են չսափրված, նրանցից երկուսը եղել են անհամեմատ ցածրահասակ, իսկ մյուսը՝ Պետրոսյանից ավելի հաղթանդամ։ Քննիչի գործողությունների դեմ ներկայացվել է հանցագործության մասին հաղորդում, սակայն դեռևս տեղեկություն չկա՝ հարուցվել է քրեական գործ, թե ոչ։

Արզումանյանի փոխանցմամբ՝ դեպքից որոշ ժամանակ անց ժամանակ անց իրական կրակողը՝ Գ. Մ.-ն ներկայացել է ոստիկանություն և ինքնախոստովանական ցուցմունք տվել այն մաիսն, որ կրակողն իրականում ինքն է եղել, սակայն նրան մեղադրանք է առաջադրվել խուլիգանության համար։

Փաստաբանը վստահեցրեց՝ կրակողն Ալենը չի եղել, ավելին, քրեական գործով փորձաքննություն էր նշանակվել, համաձայն որի՝ իր պաշտպանյալի ձեռքերի վրա կրակոցների արգասիքներ չեն հայտնաբերվել։ Ինչ վերաբերում է Պետրոսյանի նկատմամբ ընտրված խափանման միջոց կալանավորմանը, որի ժամկետն արդեն երկու անգամ երկարացվել է, փաստաբանը հայտնեց, որ կալանավորման համար հիմք է հանդիսացել այն, որ Պետրոսյանին բերման են ենթարկել, ինչը հիմք է տալիս ենթադրելու, որ ինքը կխուսափի վարույթն իրականացնող մարմնից, իսկ երկրորդ հիմքն այն է, որ տուժողը և Պետրոսյանը բնակվում են նույն համայնքում, ինչը հիմք ենթադրելու, որ վերջինս կխոչընդոտի գործի քննությանը։

Բացի դա՝ Արզումանյանն ընդգծեց, որ գործով կան իր պաշտպանյալի անմեղությունը հաստատող ապացույցներ, որոնք վարույթն իրականացնող մարմինը չի ներկայացնում, իսկ Պետրոսյանի՝ կրակոցների հետ առնչություն չունենալու վերաբերյալ ապացույցները թվարկում է հիմնավոր կասկածը հիմնավորող ապացույցների շարքում։

«Ասում ենք՝ բերեք այդ ապացույցները, ասում են՝ նախաքննական գաղտնիք է։ Եթե այդ ապացույցները չեն բերում, ուրեմն ծաղկաքաղ են արել և դատարան են ներկայացրել միայն նրա մեղավորությունը հիմնավորող ապացույցներ եք բերել։ Պարզ չէ՞ դատարանն ինչ որոշում կկայացնի»,- ասաց նա։

Պաշտպանը վստահեցնում է՝ խախտվել են իր պաշտպանյալի ՄԻԵԿ-ով սահմանված իրավունքները, մասնավորապես՝ 5-րդ հոդվածի 4-րդ կետով սահմանված իրավունքները։

Նշենք, որ Ալեն Պետրոսյանի հարազատները բողոքի ակցիա են իրականացնում ՀՀ գլխավոր դատախազության շենքի մոտ՝ պահանջելով ազատ արձակել Ալեն Պետրոսյանին։

Հեղինակ՝ Իզաբել Սահակյան

Աղբյուր` Փաստինֆո