Փաստ ինֆո

Բեյրութի նավահանգստի տարածքում սեպտեմբերի 10-ին բռնկված հրդեհը մարվել է, սակայն նավահանգստի ամբողջ տարածքում ծուխ ու մուխ է։

«Փաստինֆո»-ի հետ զրույցում լիբանահայ լրագրող Համո Մոսկոֆյանն ասաց, որ հրդեհից մարդիկ չեն տուժել, ծխախեղդ են եղել, ոմանց հիվանդանոց են տեղափոխել։ Լիբանանահայի խոսքով տեղեկություն չկա, թե քանի մարդ է հիվանդանոցում գտնվում. «Ժողովրդի զայրույթը շատ մեծ է և այդ զայրույթից վախենալով ուզում են առայժմ ամեն ինչ կոծկեն։ Ամբողջ ժողովուրդը հազիվ էր վերադարձել պայթյունից հետո, երեկ 50-60 հազար մարդ կրկին լքեց այդ շրջանը ու մինչև ուշ երեկո չէին վերադառնում»,-ասաց Համո Մոսկոֆյանը։

Նրա խոսքով պաշտոնյաները չեն ասում, թե հրդեհն ինչպես է առաջացել, պաշտոնական որևէ հաղորդագրություն չկա. «Ժողովուրդը խոսում է, որ այդտեղ օգոստոսի 4-ի պայթյունի հետ կապված գաղտնի փաստաթղթեր են եղել։ Ասում են՝ փորձել են փչացնել, սակայն չեն կարողացել վերահսկել, գնացել է դեպի անվադողերի պահեստ և ամբողջ նավահանգիստը կրկին հրդեհվել է»,-նշեց լիբանանահայ լրագրողը։

Հրդեհից հետո հայտարարել են, որ մարդիկ կրկնակի դիմակ կրել այդ տարածքում։

Հիշեցնենք, որ երեկ՝ սեպտեմբերի 10-ին, հրդեհ էր բռնկվել Բեյրութի նավահանգստի այն նույն տարածքում, որտեղ օգոստոսի 4-ին տեղի ունեցավ ավերիչ պայթյունը։

Աղբյուր` Փաստինֆո