Փաստ ինֆո

Երբ Տիգրան Սարգսյանը հրաժեշտ տվեց վարչապետական աթոռին, նրա սկսած բարեփոխումները գնահատելիս,  արձանագրեցինք այն, ինչը հիմնավորապես իրականացվել էր Հայաստանում:

Այդ շրջանում կառավարության իրականացրած բարեփոխումների արդյունքում էր, որ հանրապետությունում վարորդները մեծ հաշվով, սկսեցին կիրառել   «ամրագոտի» կոչվող երևույթը: Բացի այդ, հենց  նրա պաշտոնավարման տարիներին էր, որ փողոցային երթևեկությունը կանոնակարգվեց և մարդիկ լուսացույցի կանոններին սկսեցին խստիվ ենթարկվել:

Հիմա, հետաքրքիր է, երբ հեռանա Նիկոլ Փաշինյանը, ի՞նչ եք կարծում, ի՞նչ հետագիծ է թողնելու որպես վարչապետ: Ո՞րն է լինելու նրա իրականացրած հիմնական տնտեսական բարեփոխումը:

Բնականաբար, ոչ հատվածական ճանապարհաշինությունը, որ բյուջետային միջոցներով այսօր իրականացվում է՝ թեկուզ  մինչև որոշ գյուղական համայնքներ: Ոչ էլ՝ այն բոլոր սկսված և շարունակվող ծրագրերը, որ ինչ-որ պահից սկսած ստանձնեց իր կառավարությունը:

Եթե կա մի բան, որ բացառապես իրեն կարելի է վերագրել, ապա դա ՀԴՄ-ների կիրառման հնարավորինս համատարածությունն է և որ ամենակարևորն է՝ ՀԴՄ կտրոնների տրամադրումը քաղաքացիներին: Չտրամադրելու պարագայում էլ՝  դրանց պահանջել-ստանալը:

Իսկ այսպիսով արդյո՞ք  կարևոր խնդիր է լուծվում: Բավական է ասել, որ այս կերպ հարկային մարմինների աչքի առաջ է լինում այս կամ այն տնտեսվարողի իրական  շրջանառությունը:

Իհարկե, այս համատեքստում էլ մանինպուլյացիաներ լինում են, բայց կարևորը համատարածությունն է, որն ինչ ճիշտն է՝ ճիշտը,  ձեռք է բերվել վարչապետ Փաշինյանի համառ  հանձնարարականների, անձնական պայքարի  արդյունքում:

Սա, բնականաբար, կարևոր բարեփոխում է: Սակայն, բանն այն է, որ ներկա կառավարությունը, այսինքն՝ Փաշինյանն,  այս բնագծում հաջողություն կամ առաջընթաց արձանագրելուց հետո ուղղակի մտածեց, թե պետական բյուջեն եթե ներդրումներով չի լցվում, ապա պետք է լցնի ՀՀ քաղաքացիներից քամած հարկերով, տույժերով և տուգանքներով՝ գույքահարկից մինչև՝ դիմակի տուգանք:

Եվ ստացվում է, որ այսօր, մի կողմից բյուջետային, ըստ էության, ընթացիկ ծախսերի համար  կառավարությունը պետական պարտքը գնալով ուռճացնում է՝ պարգևավճարներ բաժանելով իր մերձավորներին ու համախոհներին,   մյուս կողմից էլ՝ հարկերի ու տուրքերի, ի հավելումն, վարկերի  բեռան տակ  շարունակական ճնշման է ենթարկում մյուս  քաղաքացիներին, անտեսելով նույնիսկ կորոնավիրուսի համաճարակով պայմանավորված տնտեսական ճգնաժամը, բազմաթիվ ոլորտներում ամիսներ շարունակ գրանցված պարապուրդները /զբոսաշրջություն, առևտուր, այլ ծառայությունների ոլորտ/,մարդկանց անաշխատ վիճակը… Կառավարության բազմակի օպտիմալացումների՝ գերատեսչական միացումների, պետական ծառայողներին  սև-սպիտակի բաժանելու արդյունքում արդեն իսկ  տարբեր մասնագիտական շրջանակներ տևական ժամանակ ռեզերվի մեջ են՝ ձևավորելով գործազուրկների մեկ այլ բանակ:

Գործազուրկներն ամեն օր ավելանում են, վկա՝ մանր ու միջին առևտրականները, որոնց գլխին սոցիալական անմխիթար պայմաններիի հետ անսպասելի կախվել է մաքսատուրքի թանկացումը:

Համատարած ահագնացող դժգոհության ֆոնին հազիվ թե  վարչապետ Փաշինյանը  նոր  հեղինակային  բարեփոխում ավելացնի ՝ ՀԴՄ-ներին:

Այնպես որ, շեշտենք՝ ՀԴՄ կտրոնն էլ հենց կմնա որպես  վարչապետ Փաշինյանի   «ֆիշկա»:

Հեղինակ՝ Մ.Մինասյան

Աղբյուր` Փաստինֆո