Փաստ ինֆո

ԱԺ կրթության հանձնաժողովը մի շարք տարաձայնություններ ունի ԿԳՄՍ նախարարության հետ։ Այս մասին երեկ լրագրողների հետ զրույցում հաստատել է ԱԺ «Իմ քայլը» խմբակցության պատգամավոր Սոֆյա Հովսեփյանը և հավելել՝ այն մարդիկ, որոնք «Իմ քայլը» խմբակցությունում հիմնականում առնչվում են չափորոշիչների և այլնի հետ, դրանք բացասաբար են գնահատում։

Սոֆյա Հովսեփյանը չի վարանել հստակեցնել նաև ՝ դժգոհության պատճառը ոչ միայն հանձնաժողովների շատ հաճախ ոչ պատշաճ գործելու հետևանք է, այլ նաև անմիջականորեն կապ ունի ԿԳՄՍ նախարար Արայիկ Հարությունյանի վարած քաղաքականության հետ։ Մինչդեռ «Իմ քայլը» խմբակցության մեկ այլ պատգամավոր՝ Արթուր Հովհաննիսյանը, հայտարարել է, թե Ա.Հարությունյանը իրականացնում է իրենց խմբակցության քաղաքականությունը։ Այլ կերպ ասած՝ պարզ է դառնում՝ իշխող թիմի ներսում ջրերը մի առվով չեն հոսում։

Լուռ է սակայն Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը, ում համառ լռությունը, ասում են, ԿԳՄՍ նախարարի հետ ունեցած խորը կոնֆլիկտի արդյունք է:

Նախօրեին հայտնի դարձավ, որ ԱԺ «Լուսավոր Հայաստան» խմբակցությունը ԿԳՄՍ նախարար Արայիկ Հարությունյանին անվստահություն հայտնելու հարցն օրակարգային դարձնելուն նախաձեռնությամբ է հանդես եկել։ Ինչպես նախօրեին «Փաստինֆո»-ի հետ զրույցում հաստատեց Երևանի ավագանու ԵԼՔ խմբակցության ղեկավար Դավիթ Խաժակյանը, եկող շաբաթվա ընթացքում ԱԺ-ում քվեարկության կդրվի Արայիկ Հարությունյանին՝ նախարարի պաշտոնից հեռացնելու հարցը։ Սրան զուգահեռ նախարարի հրաժարականի պահանջով են հանդես գալիս նաև հասարակական-քաղաքական մի խումբ գործիչներ։ Նրանք փողոցային պայքար են սկսել, պարբերաբար ցույցեր ու երթեր են կազմակերպում, Հարությունյանի նկարով պաստառներն աղբարկղ նետում և այլն:

Հնարավո՞ր է արդյոք ԱԺ «Իմ քայլը» խմբակցության պատգամավոր Արսեն Ջուլֆալակյանի օրինակին հետևեն խմբակցության այլ պատգամավորներ նույնպես, դեռևս հայտնի չէ։ «Փաստինֆո»-ին, սակայն, հայտնի է դարձել հետևյալը՝ լրատվամիջոցին մոտ կանգնած աղբյուրները վկայակոչում են՝ «Իմ Քայլ»-ում լուսաբացները խաղաղ չեն ԿԳՄՍ տխրահռչակ նախարար Արայիկ Հարությունյանի համար։ Խմբակցության ներսում կան պատգամավորներ, ովքեր կողմ են Արայիկ Հարությունյանի պաշտոնանկությանը։

Մնում է պարզել միայն՝ արդյո՞ք վարչապետ Փաշինյանին առիթ էր պետք՝ զոհաբերելով ազատվել գլխացավանք դարձած նախարար Արայիկ Հարությունյանից, որն արդյունավետ կերպով ստանձնեց իմ քայլական պատգամավոր Արսեն Ջուլֆալակյանն՝ իր աղմկահարույց հրաժարականով, թե՞ երկու տարի շարունակ «Եղիր հեզ, բանող եզ» նշանաբանով առաջնորդված Ջուլֆալակյանը հանկարծ որոշել է հավատալ իր Աստծուն, հավատալ իր հոգուն, հավատալ ինքն իրեն...

Աղբյուր` Փաստինֆո