Փաստ ինֆո

ԱԺ պատգամավորներն առաջարկում են բարձրացնել դատավորների կենսաթոշակը։ Աժ պետաիրավական մշտական հանձնաժողովի այսօրվա նիստում «Իմ քայլը» խմբակցության պատգամավոր Արթուր Դավթյանը նշեց՝ այն օրենքը, որն ընդունված է եղել դատավորներին կենսաթոշակի վճարման չափի, կարգի վերաբերյալ, Սահմանադրական դատարանի կողմից ճանաչվել է հակասահմանադրական. «Այդ բացը կարգավորման անհրաժեշտություն ունի և նախաձեռնել ենք օրենքում փոփոխություն կատարել։ Դատական օրենսգրքի 57-րդ հոդվածն առաջարկում ենք լրացնել հետևյալ կերպ, որ դատավորի կենսաթոշակի չափը չի կարող պակաս լինել նրա որպես դատավոր պաշտոնավարումը դադարելուն նախորդ 12 ամիսների ընթացքում հաշվարկված աշխատավարձի 75 տոկոսից»,-ասաց Արթուր Դավթյանը։

«Իմ քայլը» խմբակցության պատգամավոր Սերգեյ Ատոմյանը հետաքրքրվեց, արդյոք 75 տոկոսը համապատասխանում է նախկին կարգավորումներին, պակաս է, թե ավել։ Արթուր Դավթյանը նշեց, որ նախկինում եղել է 55 տոկոս, որը ՍԴ-ն հակասահմանադրական է ճանաչել, այսինքն` այս դեպքում ավելանում է. «Եթե ՍԴ-ի որոշումը չլիներ, դատավորը ստանալու էր 55 տոկոս, հիմա այդ որոշումը կա և եթե դատավորը թոշակի գնա, այդ 55-ը չի ստանալու, բայց նաև չունենք այս պահի դրությամբ գործող օրենք, որ այս 75-ը պիտի ստանա։ Ինքը գնալու է ստանա հասարակ թոշակավորման եղանակով, այսինքն` մոտ 30-40 հազար դրամ է լինելու։ Իրավիճակը սա է և օրենքը պարտադրում է, որ բարձր պետք է լինի թոշակը»,-ասաց Արթուր Դավթյանը։

Աշխատանքի և սոցիալական հարցերի փոխնախարար Սմբատ Սաիյանը հայտնեց, որ մենք այս պահին ունենք մոտ 77 դատավոր, որոնք կենսաթոշակ են ստանում. «Նրանցից 35-ին նշանակվել է 2014 թվականի հուլիսի 1-ից հետո։ Մենք ունենք դեպքեր, երբ դատարանի որոշման հիման վրա նշանակվել է կենսաթոշակ, որի չափը որևէ իրավակարգավորման տակ չի մտնում»,-ասաց փոխնախարարը։

Վերջինս ընդգծեց, որ դատավորի համար կենսաթոշակի երաշխավորված չափն իր վերջին պաշտոնի համար սահմանված աշխատավարձի 75 տոկոսն է։

Աղբյուր` Փաստինֆո