Փաստ ինֆո

«Ես ինձ համար երկու օր էի ընտրել՝ Հայաստանի Ազգային արխիվի տնօրենի պաշտոնից պատվով - հարգանքով հեռանալու համար։ Դա կամ կլիներ այս տարվա նոյեմբերի 27-ին, երբ լրանում է իմ պայմանագրի ժամկետը, կամ հաջորդ տարի օգոստոսի 17-ին, եթե երկարաձգեին պայմանագիրը, ինչն օրենքը թույլ է տալիս։ Բայց սեպտեմբերի 7-ին Արդարադատության նախարար Ռուստամ Բադասյանը հրաման է արձակել, որով ինձ ազատել է աշխատանքից, պատճառաբանելով, որ պետական կազմակերպության կողմից վճարման ենթակա հարկերը կամ պարտադիր այլ վճարներ իմ մեղքով, սահմանված ժամկետի հետ հաշվետու ժամանակաշրջանում չեմ վճարել,- ասում է Ազգային արխիվի արդեն նախկին տնօրեն Ամատունի Վիրաբյանը, մեկնաբանելով Արդարադատության նախախարի՝ իրեն աշխատանքից ազատելու վերաբերյալ որոշումը։

Նրա խոսքերով՝ այս տրամաբանությամբ առաջնորդվելու դեպքում՝ մինչև 2019 թվականն աշխատած ՊՈԱԿ-ների բոլոր տնօրենները պետք է հեռացվեն աշխատանքից, որովհետև օրենքը սահմանում է, որ ՊՈԱԿ-ները պետք է ավելացված արժեքի հարկ վճարեն, սակայն բյուջեով այդ գումարը չի նախատեսվել։ Բայց ոչ մի տնօրեն աշխատանքից չի ազատվել, ազատվել եմ միայն ես։ Ենթադրում եմ, որ Արդարադատության նախարարությունը կամ չի տիրապետում օրենսդրությանը, կամ շատ է շտապել և օրենքը մինչև վերջ չի կարդացել։ Ենթադրում եմ նաև, որ այս հարցում քաղաքական որոշում կա»։

«Փաստինֆո»-ի հետ զրույցում, մեկնաբանելով աշխատանքից ազատման հրամանի հանգամանքները, Ամատունի Վիրաբյանն ասում է՝ հրամանն անակնկալ չի եղել, մոտ մեկ ամիս առաջ նախարար Բադասյանի խորհրդականների կողմից առաջարկներ եղել են՝ թողնելու պաշտոնը։ Աշխատանքից ազատման հրամանից հետո, սակայն, Արդարադատության նախարար Ռուստամ Բադասյանն իրեն չի ընդունել, խոսակցությունները տեղի են ունեցել միայն նախարարի խորհրդականների միջոցով։ Հիմա էլ զբաղված է ընդունման - հանձնման ակտի նախապատրաստման գործերով։ Իրեն փոխարինող է նշանակվել տեղակալը, հավանական նոր տնօրենի մասին որևէ տեղեկության չի տիրապետում, տեղյակ չէ.«Մեղադրանքը, որով ինձ ազատել են աշխատանքից մեկ բառով ասած՝ անհիմն եմ որակում, իբրև թե հարկեր չեմ վճարել։ Չենք վճարել, որովհետև բյուջեն գումար չի փոխանցել, իսկ երբ փոխանցումը եղել է, վճարումն անմիջապես կատարվել է»։

Պատասխանելով լրագրողի նկատառմանը, թե աշխատանքից ազատման հրամանում բացահայտ արհեստածին տարրեր կան, Ամատունի Վիրաբյանն ասում է՝ բուն պատճառների մասին, անկեղծորեն, ոչինչ ասել չի կարող.«Քանի որ Ազգային արխիվը գտնվում է Արդարադատության նախարարության ենթակայության տակ, կա նախարար Բադասյանի՝ ինձ աշխատանքից ազատելու վերաբերյալ հրամանը՝ հարկեր չվճարելու անհիմն պատճառաբանությամբ։ Դիմելու ենք դատարան՝ բողոքարկելու համար որոշումը։ Հիմա մենք հրամանը դատական կարգով վիճարկելու հայցն ենք նախապատրաստում»։

Չի՞ կարծում արդյոք ինքը, որ Ազգային արխիվի տնօրենից այսօրինակ հապշտապ կերպով ազատվելու հիմքում հերթական հակահայկական հարձակումն է նախապատրաստվում՝ այս անգամ արդեն՝ հույժ կարևոր փաստաթղթեր և տեղեկատվություն պարունակող ազգային կառույցի նկատմամբ հարցին, Ամատունի Վիրաբյանը պատասխանում է՝ ամեն ինչ հնարավոր է, ո՛չ ժխտում, ո՛չ էլ հաստատում է. «Հայաստանի Ազգային արխիվը խոցելի տեղեր չունի։ Սա երկար տարիների ընթացքում ձևավորված կուռ կառուցվածք է, այնպես որ, այն խոցել գրեթե անհնարին է։ Ազգային արխիվում, իհարկե կան հայոց պատմության, տնտեսության, քաղաքականության և այլ ոլորտներին վերաբերվող անվտանգային նշանակություն ունեցող կարևորագույն փաստաթղթեր, հիմնական փաստաթղթերի թվագրումը սկսում է 1829 թվականից և հասնում մինչև մեր օրերը։ Հույժ գաղտնի կամ գաղտնի փաստաթղթեր Ազգային արխիվում՝ նոր օրենքի համաձայն չկան։ Քանի որ սա հանրային կառույց է, այստեղ փաստաթղթերն ընդունվում են միայն գաղտնազերծվելուց հետո, այսինքն՝ գաղտնի փաստաթղթեր պահելու իրավունք Ազգային արխիվը չունի»։

Թե ինչպե՞ս կդասավորվի Ազգային արխիվի հետագա ճակատագիրը, Ամատունի Վիրաբյանը հստակ ոչինչ ասել չի կարող՝ ամեն ինչ կախված է նրանից, թե ինչ քաղաքականություն կորդեգրի արխիվի նոր տնօրենը։

Հեղինակ՝ Նվարդ Մանվելյան

Աղբյուր` Փաստինֆո