Փաստ ինֆո

Կոռուպցիայի կանխարգելման հանձնաժողովն այս տարվա նոյեմբերին կդառնա մեկ տարեկան։ 10 ամիսների ընթացքում հանձնաժողովը ընդհանուր 31 բարեվարքության եզրակացություն է տվել, որից 3-ը եղել է բացասական, 15-ը դրական, 13 եզրակացություն էլ եղել է դրական՝ վերապահումով։ Մինչև օրս հանձնաժողովը միայն մեկ անգամ է նյութեր ուղարկել դատախազություն՝ չնայած երեք անձի վերաբերյալ տվել է բացասական եզրակացություն:

«Փաստինֆո»-ն զրուցեց հանձնաժողովի նախագահ Հայկուհի Հարությունյանի հետ՝ պարզելու թե արդյոք հանձնաժողովը պետք է բացասական եզրակացության դեպքում դիմի իրավապահներին։

«Եթե կա ինչ-որ խնդիր՝ մենք միանգամից ուղարկում ենք դատախազություն։ Եթե խնդիրը մեզ մոտ այն տեսակի չկայացված կասկած է ձևավորում, որ մենք բացասական եզրակացություն ենք տալիս՝ ասում ենք, բայց քանի որ մեղքի տեսանկյունից քննություն պահանջող գործընթաց է, մենք ինքներս մեծ ենթադրյալ խախտումը ինքնին չենք դարձնում՝ եզրակացության շրջանակներում մեր կողմից հաստատված փաստ, ասում ենք, որ օրինակ հանձնաժողովի մոտ տվյալների անճշտություն կա, որոնք ինչ-որ ձևով խարդախությամբ ձեռք բերված տվյալ է, կամ տվյալի կեղծել։ Հիմա մենք դրա մասին եզրակացությունով կասկածը հայտնում ենք, ուղարկում նյութերը նախապատրաստվող՝ քրեական վարույթի շրջանակներում ուսումնասիրության համար։ Դա ցանկացած կասկածի դեպքում չէ, հիմնականում հարցաթերթիկում լրացված տվյալների արժանահավատությանն է վերաբերում, այսինքն ՝ ինքը գրել է 5 տարի աշխատանքային ստաժ ունի իքս մարմնում, բայց պարզվում է, որ խաբել է՝ դա չենք կարողանում անտեսել»,- ասաց Հարությունյանը։

Դատելով տվյալներից՝ ենթադրում ենք, որ եթե մինչև օրս տրված երեք եզրակացություններից միայն մեկն է ուղարկվել դատախազություն, իսկ մյուս երկուսը «հանցագործության տարրեր» չեն պարունակել, ապա ՍԴ դատավորի պաշտոնի թեկնածու Երվանդ Խունդկարյանի մասին՝ մամուլում պտտվող տեղեկությունները, թե թեկնածուին բացասական եզրակացություն է տրվել՝ իրավապահների կողմից չի քննվում։

Աղբյուր` Փաստինֆո