Փաստ ինֆո

Մենք դպրոցներն ուզում ենք բացենք և չփակենք։ Փորձարկումներ չենք անելու, մենք դպրոցները պետք է բացենք այնպես, որ կրկին փակելը բացառվի։ Այս մասին կառավարության նիստի ժամանակ ասաց ՀՀ վարչապետ Նիկոլ Փաշինյանը։

«Մենք դեռ մայիսից ենք այդ քաղաքականությունը վարել և շատ մոտ էինք եզրին, որ չկարողանայինք այլևս շարունակել, բայց մենք գնացինք այդ ճանապարհով, որ բացում ենք և չենք փակում։ Հետևաբար պետք է մաքսիմալ կանոնները պահենք, մաքսիմալ խիստ մոտենանք հարցերին, որպեսզի բացելուց հետո չփակենք։ Մեր փորձը ցույց տվեց, որ ցավոք սրտի խնդրել, աղաչել, պաղատելով չի ստացվում։ Երբ դա չի ստացվում, պետք է վարչական միջոց կիրառվի։ Ի վերջո սա պետություն է։ Ի՞նչ է նշանակում ոստիկանը մոտենա քաղաքացուն ասի՝ պետք ա դիմակ կրեք, քաղաքացին սկսի ոստիկանին վիրավորել, չի կարող այդպիսի բան լինի»,-ասաց վարչապետը։

ՀՀ փոխվարչապետ Մհեր Գրիգորյանն էլ նկատեց՝ որքան էլ միասնական ստանդարտ սահմանենք, էպիդեմիոլոգիական իրավիճակը լինելու է թիվ մեկ գործոնը, որպեսզի այդ կանոնին երկիրը ենթարկվի կամ չենթարկվի. «Առավել զգույշ և առավել կանոնակարգված պետք է լինենք, որովհետև երկրորդ ալիքի վտանգն օդում կախված է։ Երկրներ կան, որ իրենց գործողությունների տրամաբանությունը բխում է հենց երկրորդ ալիքի հավանականությունից։ Այդ իմաստով վիճակագրությունը և կայունությունը շատ կարևոր է, ինչը նշանակում է՝ առավել զգույշ պետք է լինենք»,-ասաց Մհեր Գրիգորյանը։

Աղբյուր` Փաստինֆո