Փաստ ինֆո

«Իմ քայլը» խմբակցության ղեկավար Լիլիթ Մակունցը հրաժարվել է մեկնաբանել նախարար Արայիկ Հարությունյանի հետ տարաձայնությունների մանդատից հրաժարվելու պատճառով իրենց խմբակցության պատգամավոր Արսեն Ջուլֆալակյանի որոշումը:
«Ես այդ թեման այս պահին չեմ մեկնաբանում: Միակ բանը, որ ուզում եմ ընդունեք ի գիտություն, պարոն Ջուլֆալակյանի հանրային հրապարակումն է»,- ասաց նա:

Հարցին՝ արդյոք կարծիք հայտնելու կաշկանդվածութուն ունի՞, Լիլիթ Մակունցը պատասխանեց. «Որևէ հարցում կաշկանդվածություն չունեմ, այս պահին նպատակահարմար չեմ գտնում որևէ մեկնաբանություն տալ»:

Հիշեցնենք, որ մանդատից հրաժարվելու իր որոշման մասին հունահռոմեական ոճի ըմբիշ, աշխարհի չեմպիոն և «Իմ քայլը» խմբակցության պատգամավոր Արսեն Ջուլֆալակյանը հայտարարել է երեկ։

«Դիմել եմ ՀՀ ԱԺ նախագահ պրն. Արարատ Միրզոյանին պատգամավորական մանդատս վայր դնելու կապակցությամբ։

Նման քայլի հիմնապատճառ է հանդիսացել ՀՀ ԿԳՄՍ նախարար Արայիկ Հարությունյանի հետ ունեցած սկզբունքային անհամաձայնությունները նրա ենթակայության տակ գտնվող ոլորտների ներկա կառավարման մոտեցումների վերաբերյալ: Կարծում եմ, որ որդեգրած ուղին անհեռանկար է, չի ապահովելու նշյալ ոլորտներում առկա խնդիրների լուծումն ու զարգացումը: Հետևաբար, նման պայմաններում իմ հետագա գործունեությունը, վստահաբար, չի ծառայի ԱԺ պատգամավորի՝ մեր պետության և քաղաքացու շահերի արդյունավետ պաշտպանության իմ առաքելությանը»,- հայտարարել է Ջուլֆալակյանը:

Աղբյուր` Փաստինֆո