Փաստ ինֆո

Սպանության փորձի մեջ մեղադրվող ամբաստանյալի հարազատները Գեղարքունիքի մարզի ընդհանուր իրավասության դատարանի Վարդենիսի նստավայր տանող ճանապարհն շրջափակել էին՝ պահանջելով ազատ արձակել Վահագն Մանուկյանին։ Մեղադրյալի կինը «Փաստինֆո»-ի հետ զրույցում ասաց, որ շուրջ երեք տարի առաջ իր ամուսնուն ձերբակալել են Վարդենիսի Սոթք ոսկու հանքի տարածքից՝ 2016թ տեղի ունեցած միջադեպի գործով. կրակոցներ են հնչել, ինչի արդյունքում ազգությամբ ռուս անվտանգության աշխատակից է տուժել։ Մանուկյանի կինը վստահեցնում է, որ իր ամուսինն անմեղ է, պարզապես կեղծիք է տեղի ունեցել, քննիչների մասնակցությամբ ցուցմունքները կեղծել են, ռուս անվտանգության աշխատակցին հեռացրել են ՀՀ-ից և արդեն շուրջ 3.5 տարի է, ինչ պնդում են, թե վերջինիս հայտնաբերել չի հաջողվել։

«Մենք սոցիալական ցանցերի միջոցով գտել ենք պատահականորեն։ Հարազատներից մեկը նամակ է գրել նրան՝ հայտնելով, որ այդ մարդուն դատում են, նա քեզ վնաս պատճառե՞լ է, իսկ այդ մարդն ընկել է շոկի մեջ, ասել՝ իրեն խաբել են, իրեն Հայաստանից ուղարկել են՝ նշելով, որ Վահագնին ազատ են արձակել։ Ինքն էլ հելել ու եկել -հասել էր Հայաստան»,- ասաց Մանուկյանի կինը։ Վերջինիս փոխանցմամբ՝ նա ներկայացել է դատարան, հայտնել, որ Վահագնը մեղավոր չէ, ավելին, նշել է, որ քննիչներն են ուղղորդել, որ հարցաքննության ընթացքում տա Վահագնի անունը։ Կինը վստահեցնում է՝ ռուս անվտանգության աշխատակիցը Վահագնի անունը չի տվել, ցուցմունքները կեղծվել են։

Մանուկյանի պաշտպան Վարդանն Համբարձումյանն էլ «Փաստինֆո»-ի հետ զրույցում ասաց, որ նրան մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասով(սպանության փորձի), ՀՀ ՔՕ 235-րդ հոդվածի 1-ին մասի(ապօրինի հրազեն իրացնելը, պահելը, կրելը) և ՀՀ ՔՕ 34-177-րդ հոդվածի 2-րդ մասով (գողության փորձ), Մանուկյանը շուրջ 3 տարի 4 ամիս է, ինչ գտնվում է կալանքի տակ։ Նրա փոխանցմամբ՝ գործով տուժողները դատաքննության ընթացքում տարիներ շարունակ չեն ներկայացել դատարան, իսկ նախաքննության ընթացքում առերես հարցաքննություն չի եղել։

Փաստաբանը հայտնեց, որ ըստ մեղադրանքի՝ Վահագն Մանուկյանն ինքնաձիգով կրակահերթ է արձակել, որի արդյունքում տուժել է ազգությամբ ռուս Յուրա Մելնիկը, ով երեք տարի անց՝ 2020թ սեպտեմբերի 3-ին ներկայացել է դատարան և հայտարարել, որ Վահագն Մանուկյանն իր ուղղությամբ չի կրակել, ինքնաձիգը գտնվել է իր ձեռքում, կրակահերթեր են արձակվել, ինչի արդյունքում ինքը ստացել է մարմնական վնասվածք։ Փաստաբանի խոսքով՝ տուժողը մի քանի անգամ շեշտել և պնդել է, որ նախաքննության ընթացքում քննիչին ասել է այդ մասին, սակայն քննիչը չի արձանագրել և հենց դատարանում հանցագործության մասին հաղորդում է ներկայացրել։ Բացի դա՝ ոստիկանության 5 աշխատակիցների վերաբերյալ այսօր Մանուկյանն է հանցագործության մասին հաղորդում ներկայացրել, քանի որ, փաստաբանի խոսքով, 2016թ դեկտեմբերի 2-ին կեղծ բովանդակության զեկուցագրեր էին ներկայացրել իրենց վերադասին, թե իրենք տեսել են Մանուկյանին կրակելուց, որի նկատմամբ տուժողները, կոնկրետ՝ Յուրա Մելնիկը սամբոյի հնարքներ կիրառելով խլել է ինքնաձիգը, մինչդեռ, դատարանում նրանք ցուցմունք են տվել այն մասին, որ իրականում դեպքի վայրում չեն եղել։ Փաստաբանը վստահեցրեց՝ քննությունը եղել է միակողմանի։ Ինչ վերաբերում է խափանման միջոցին, փաստաբանը նշեց, որ միջնորդություն էր ներկայացրել դատարան՝ կալանքը փոփոխելու մասին միջնորդությունը, որը մերժվել է և դատարանի որոշմանը ծանոթանալուց հետո, ամենայն հավանականությամբ, վերաքննիչ բողոք կներկայացվի։

«Մարդն արդեն երեք տարի չորս ամիս գտնվում է արգելանքի տակ և գործով փաստական տվյալները, այդ թվում՝ տուժողը, հաստատել են, որ այդ կրակոցները չեն արձակվել Մանուկյանի կողմից»,- ասաց Համբարձումյանը։

Նշենք, որ մինչ տուժողի՝ դատարանում ցուցմունք տալը դատաքննությունն արդեն մոտեցել էր ավարտական փուլին և մեղադրող դատախազը հրապարակել էր մեղադրական ճառը՝ պահանջելով մեղավոր ճանաչել Վահագն Մանուկյանին առաջադրված մեղադրանքներում և դատապարտել ազատազրկման՝ 14 տարի ժամկետով, սակայն տուժողի ցուցմունքը շրջադարձային է եղել և գործով այժմ դատաքննությունը շարունակվում է։ Համբարձումյանը գտնում է, որ խախտվել են իր պաշտպանյալի ազատության և արդար դատաքննության իրավունքները, քանի որ ՀՀ քրեական դատավարության 17-րդ հոդվածը բացարձակապես չի պահպանվել և ամբողջ նախաքննության ընթացքում քննիչները պատշաճ կերպով չեն հարցաքննել գործով վկաներին, այժմ նրանք գտնվում են ՀՀ-ից դուրս, ուստի անհնարին է դարձվում նաև դատարանում նրանց հարցաքննելու իրավունքը։ Բացի այդ, փաստաբանը հայտնեց, որ գործով երկու վկաներին, որոնք հենց դեպքի օրն են տեսել Վահագն Մանուկյանին, քննիչը հարցաքննել է նրանց դեպքից 40 օր անց, ուստի, բացառված չէ, որ նրանք կարող էին պայմանավորվել ցուցմունք տալիս։

Նշենք, որ քրեական գործով մեղադրյալներն ի սկզբանե երեքն են եղել, որոնցից երկուսի նկատմամբ կիրառվել է համաներումը և այժմ քրեական հետապնդում իրականացվում է միայն Վահագն Մանուկյանի նկատմամբ։

Ոստիկանությունից «Փաստինֆո»-ին հայտնեցին, որ բանակցությունների արդյունքում քաղաքացիները բացել են ճանապարհը։

Հեղինակ՝ Իզաբել Սահակյան

Աղբյուր` Փաստինֆո