Փաստ ինֆո

Մի խումբ համախոհներով մենք ստեղծել ենք ազգային արժեքների պաշտպանության նախաձեռնություն, որի առանցքային հիմքերում Հայ առաքելական սուրբ եկեղեցին, ընտանիքը, մանկությունը (մասնավորապես դեռահասների կրթական և հատկապես սեռական կրթությանը նախատեսվող հարցերը) և ազգային մշակութային արժեքները արտաքին ու ներքին սպառնալիքներից, տարատեսակ կոնվենցիաներից օրենսդրորեն պաշտպանելու հարցն է։

Մինչ նախաձեռնության ամբողջ ծավալով մեկնարկը գնացել էինք Վեհափառ Հայրապետի օրհնությունը ստանալու,- ասում է ԵՊՀ արևելագիտության ֆակուլտետի դեկան, պատմական գիտությունների դոկտոր, պրոֆեսոր Ռուբեն Մելքոնյանը՝ «Փաստինֆո»- ի հետ զրույցում ներկայացնելով Մայր Աթոռ Սուրբ Էջմիածնում Ամենայն Հայոց կաթողիկոս Գարեգին Երկրորդի հետ հանդիպումն մանրամասները,- նախաձեռնությունն առաջիկայում ներկայացնելու ենք օրենսդիր և գործադիր մարմինների քննարկմանը, բայց մինչ այդ կներակայացնենք տարբեր շահագրգիռ կազմակերպություններին, որպեսզի ստանանք առաջարկներ, հավելումներ և այլն։ Նախաձեռնությունը ապաքաղաքական է, վերաբերում է բոլորիս համար կարևոր հարցերին։

Կարծիքներ և մեկնաբանություններ ստանալուց հետո օրենքի նախագիծը որոշակի բարեփոխումների կենթարկվի, որին կհաջորդի ստորագրահավաքը, նպատակ ունենալով նախաձեռնության կետերը ներկայացնել նաև հասարակության լայն շերտերին, հասարակական քննարկման դնելով այն։ Այս ամենի վերջնական նպատակը Հայ Առաքելական Սուրբ եկեղեցին, ընտանիքը, մանկությունը և ազգային մշակութային արժեքները օրենսդրորեն պաշտպանության տակ առելն է»-, ասում է «Ազգային արժեքների պաշտպանություն» նախաձեռնության հիմնադիր անդամներից թուրքագետ Ռուբեն Մելքոնյանը։ 

Հիշեցնենք, որ նախօրեին Մայր Աթոռում Ամենայն Հայոց Կաթողիկոսն ընդունել է «Ազգային արժեքների պաշտպանություն» նախաձեռնության անդամներին։ Այս մասին հաղորդում է Մայր Աթոռի տեղեկատվական համակարգը։ Նախաձեռնության անդամները Վեհափառ Հայրապետին են ներկայացրել նախաձեռնության առաքելությունն ու ծրագիրը, անդրադարձ են կատարել նախաձեռնության հեղինակած օրենքի նախագծին՝ ուղղված Հայաստանյայց Առաքելական Սուրբ Եկեղեցու, հայոց լեզվի, մշակութային ժառանգության, ընտանիքի և մանկության պաշտպանությանը։

Նորին Սրբությունն իր օրհնությունն ու գնահատանքն է փոխանցել հայորդիներին և կարևորել ազգային արժեքների պաշտպանության հարցում նրանց ազնիվ ձգտումներն ու նախանձախնդրությունը։

Ամենայն Հայոց Կաթողիկոսը հաստատել է՝ հայոց ինքնությունը դարերով կերտած ազգային-հոգևոր արժեքները և նախնիներից ավանդված ժառանգությունը գրավականն են ազգի հարատևության և մեր անկախ պետականության ամրության:

Հեղինակ՝ Նվարդ Մանվելյան

Աղբյուր` Փաստինֆո