Փաստ ինֆո

Չկա նման մի մարդ կամ մարդկանց խումբ, ում պատճառով կամ ում չեզոքացնելու համար հնարավոր է բարձրագույն դատական մարմինները միավորելու որոշում կայացնել։ Այս մասին լարգրողների հետ զրույցի ժամանակ ասաց ՀՀ արդարադատության նախարար Ռուստամ Բադասյանը՝ անդրադառնալով այն կարծիքին, որ գերագույն դատարանի ստեղծումը քաղաքական խնդիր է լուծում՝ Հրայր Թովմասյանին դատարանից դուրս թողնելով։

«Դա գաղափարական որոշում է, դա սահմանադրականության ոգին դատական համակարգ բերելու խնդիր է լուծում և դա ինստիտուցիոնալ և հեռուն գնացող բարեփոխում է, որն արվում է ՀՀ քաղաքացիների, դատական համակարգում փոփոխությունների շարքը շարունակելու միտումով և լուծում է ռազմավարական խնդիրներ։ Անլուրջ եմ համարում նման փաստարկների մասին անգամ մտածելը»,-ասաց նախարարը՝ հավելելով, որ նախատեսում են հոկտեմբերի վերջին ունենալ հայեցակարգ, որը կներկայացվի հանրային քննարկման։

Անդրադառնալով ապօրինի գույքի բռնագանձման օրենքին՝ Ռուստամ Բադասյանն ասաց, որ ստորաբաժանումը ձևավորվեց, ինչ նշանակում է, որ օրենքն ամբողջ ծավալով ուժի մեջ է մտըել. «Նշանակում է՝ հիմա դատախազության հատուկ ստորաբաժանումը կարող է ստանալով համապատասխան հիմքերը, որոնք սահմանվել էին օրենքում, սկսել ուսումնասիրությունները։ Ինչպես նախկինում, այնպես էլ հիմա այն կարծիքին եմ, որ այդ ուսումնասիրություններն այնքան ծավալուն են, որ ակնկալել՝ 2021 թվականի առաջին եռամսյակից շուտ որևէ հայց կգնա դատարան, սխալ կլինի։ Հիմա դատախազության գործունեության այն հատվածն է լինելու, որը հասարակության համար տեսանելի չէ, իսկ տեսանելի հատվածին ականատես կլինենք 2021 թվականի ընթացքում»,-ասաց Ռուստամ Բադասյանը։

Աղբյուր` Փաստինֆո