Փաստ ինֆո

Այն մարդիկ ովքեր իրենց դեմքով, իրենց պատկանող լրատվամիջոցներով տարածում են զրպարտություն, վիրավորանք, օգտագործելով նաեւ ֆեյքային բանակներ, այսօր ներկայանում են նման նախագծով: Վստահություն այդ մարդու նպատակի նկատմամբ, ես եւ մեր խմբակցությունը չունենք: «Փաստինֆո»-ի հետ զրույցում այս մասին ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը` անդրադառնալով ԱԺ փոխնախագահ Ալեն Սիմոնյանի հեղինակած օրենսդրական նախաձեռնությանը, որով առաջարկվում է փոփոխություններ կատարել ՀՀ քաղաքացիական օրենսգրքում եւ սոցիալական ցանցերում և լրատվամիջոցներում հրապարակված վիրավորանքի և զրպարտության համար փոխհատուցման չափը վիրավորանքի դեպքում 1 մլն դրամից դարձնել 5 մլն դրամ, զրպարտության դեպքում՝ 2 մլն դրամից՝ 10 մլն դրամ։

««Իմ քայլը» խմբակցությունը երկար ժամանակ օգտագործել է ֆեյքային ռեսուրսներ թե՛ հեղափոխության ընթացքում, թե՛ հեղափոխությունից հետո` իր քաղաքական հակառակորդներին վարկաբեկելու, քաղաքական դաշտից դուրս շպրտելու համար: Հիմա, երբ իրենցից բացի մյուս կողմը եւս սկսել է օգտագործել նման միջոցներ` ստեղծել իրենց ֆեյքային բանակները, իշխանությունն սկսել է անհարմար շարժումներ անել նստած տեղում` հասկանալով, որ սա խնդիր է: Այդ «զենքի» հաջողությունը իշխանությունն արդեն մի անգամ ունեցել է եւ վախենում է, որ նույն զենքով իրեն կսպանեն»,-ընդգծեց պատգամավորը՝ նշելով, որ ինչպես միշտ փորձ է արվում գնալ հեշտ, բայց անարդյունավետ ճանապարհով:

Նրա դիտարկմամբ՝ միշտ չէ, որ այդ պատասխանատվության խստացումը արդարացնում է նպատակը եւ կարող է արդյունավետ գործիք լինել։ Ավելին՝ նրա կարծիքով՝ այս նախագիծը կարող է «մահակ» դառնալ լրատվամիջոցների համար, եթե վերջինները հրաժարվեն բացահայտել տեղեկատվության աղբյուրը, որի արդյունքում հրապարակված տեղեկատվությունը կարող է դիտվել որպես զրպարտություն։ «Մենք գիտենք, որ գործող իշխանությունը այնքան էլ բարյացակամ չէ լրատվամիջոցների նկատմամբ: Ոչ միայն քաղաքականության մեջ են սեւ ու սպիտակ անում, այլ նաեւ լրատվամիջոցների մեջ են խտրականություն դնում: Պատժամիջոցների խստացումը կարծում եմ, որ մահակ է դառնում ազատ խոսքի արտահայտման համար, նաեւ լրատվամիջոցների «գլխին»: Նման պատիժները խստացնելով մի օր էլ կգան կասեն` սա չաշխատեց, ուզում ենք քրեականացնենք: Վստահ եմ` իրենց վարքագիծը չի փոխվելու այս առումով: Քաղաքական հակառակորդներին այդ գործիքներով «սպանելը» դարձել է արդեն սովորություն, ինչից հրաժարվելու համար քաղաքական կամք է պետք, որը չունեն այս մարդիկ»,- նշեց պատգամավորը:

Սամսոնյանը գտնում է, որ պաշտոնյանները պարտավոր են նախ իրենց վարքագծի վրա աշխատել: Նրա դիտարկմամբ` հանրային քաղաքականության դաշտում ստեղծվել է մի իրավիճակ, երբ բարձրաստիճան պաշտոնյաներն իրենց ֆեյսբուքյան էջերը, ԱԺ ամբիոնը, մեծ մասամբ էլ մեդիան են օգտագործում` տարածելով զրպարտություն, վիրավորանք եւ ըստ էության դրանով խրախուսում հանրությանն ընդօրինակել այդ վարքագիծը: «Երբ այս վարքագիծը բումերանգի պես հետ է վերադառնում տարածողներին, իրենք որոշում են, որ անհրաժեշտ է պայքարել դրա դեմ եւ խստացնել օրենքը: Նախեւառաջ՝ մենք պարտավոր ենք մեր վարքագծի վրա աշխատել` լինելով հանրային պաշտոնյաներ, հետո միայն օգտագործել հասարակությանը բարոյապես կրթելու, օրինակելի, օրինաչափ վարքագիծ ցուցադրելու գործիքակազմը: Այսօր դա չի արվում, հակառակը` արվում է ամեն ինչ, որպեսզի ջարդեն հասարակության մեջ օրինակելի վարքագծի նկատմամբ ճիշտ վերաբերմունքը»,-նկատել է պատգամավորը:

Հիշեցնենք, որ նախագիծը չի վերաբերում կեղծ օգտատերերին` ֆեյքերին, քանի որ, ըստ Ալեն Սիմոնյանի, չի կարող պարզվել` ով է պատասխանողը: Հարցին` թե ի՞նչու այսօր թիրախավորված պայքար չի գնում կեղծ օգտատերերին` ֆեյքերին բացահայտելու, պատժամիջոցներ կիրառելու ուղղությամբ, Սամսոնյանն ասաց, որ այս նախագիծն ընդամենը աչքակապություն է, խաբկանք հասարակության համար: «Ֆեյքային դաշտն այնպիսի ռեսուրս է, որ թույլ է տալիս առանց պատասխանատվության եւ պատժի շարունակել մարդկանց զրպարտել եւ վիրավորել: Սա շատ լավ դաշտ է, որի վրա այս նախագիծը փաստորեն չի տարածվում: Այս մասով այսպես ասած` արխային են: Մնացածը լրատվամիջոցների բեռն է դառնում»,-շեշտեց պատգամավորը:

Աղբյուր` Փաստինֆո