Փաստ ինֆո

Երևանի ավագանին քննարկում էր «Երևանի կենդանաբանական այգի» համայնքային ոչ առևտրային կազմակերպության կանոնադրության մեջ փոփոխություն կատարելու մասին հարցը։«Իմ քայլը» խմբակցությունից Արման Անտոնյանին, ով խոսում էր Երևանի կենդանաբանական այգու խնդիրների մասին, դիմեց «Բարգավաճ Հայաստան» խմբակցության անդամ Արմեն Ներսիսյանը.

«Էս 40 րոպե ա բոլորին պատմում եք, որ Կենդանաբանական այգին շատ վատ վիճակում է: Ես չտեսա մի անգամ, գոնե դուք կամ ձեր նման մտածող մարդիկ գնաք Վարդաշեն, 7 ամիս է ասում ենք՝ Վարդաշենի վթարային շենքը փլվում է մարդկանց գլխին, մի օր Ձեր կողմից չլսեցինք, որ գոնե մի հինգ րոպե, մի անգամ գոնե գնաք մի անգամ այցելեք այդ բնակիչներին։ Կենդանի մարդիկ որոնք ամեն րոպե սթրեսի մեջ, իրենց կյանքն են վտանգում, մի անգամ չգնացիք նրանց կողքին կանգնեք, դուք կենդանաբանական այգին, որ իր տրամաբանական առավոտը լույսը բացվում ՝ երեկոն, արևը վայր է իջնում, իր բնական հունով աշխատում է, դուք 40 րոպե էս թեմայի մասին եք խոսում: Որքա՞ն կարելի է մեր համբերությունը չարաշահել: Եվ խոստացել եք երևանցիներին իրենց հարցով զբաղվելու եք։ Երբ եք գնալու վարդաշենի վթարային շենքեր, ամեն օր քանդվում է այդ շենքը, հազիվ 4-րդ կարգի վթարային տվեցիք։ Կբացատրեք ե՞րբ եք զբաղվելու երևանցիների հարցերով: Խոստացել եք, խաբել եք մի ամբողջ երևանցիների»։

Ի պատասխան՝ նիստը նախագահող Երևանի փոխքաղաքապետ Հրաչյա Սարգսյանն ասաց. «Բարձրախոսն աշխատում է, բղավելու կարիք չկա»:

Արման Անտոնյանն էլ անդրադառնալով դիտողություններին, ասաց. «Եթե պետք լինի՝ 45, 50 րոպե էլ կխոսեմ, որովհետև պատասխանում եմ մեր գործընկերների հարցերին: Տրամաբանություն կա, թե՞ ոչ, դա թողնում եմ ձեր վերլուծությանը, ինձ չի վերաբերում: Ինչ վերաբերում է խոստումներին, Վարդաշենի բնակիչներին, առնվազն ինձ նման տոնով ու նման ձևակերպումներ չպետք է անեք»:

Աղբյուր` Փաստինֆո