Փաստ ինֆո

Այսօր էլ վիրավորանքի և զրպարտության համար տուգանք նախատեսված է, և գումարի չափի փոփոխությունը որևէ կերպ չի կարող ազդել խոսքի ազատության վրա, որովհետև խոսքի ազատություն չի նշանակում վիրավորանք կամ զրպարտություն։ «Փաստինֆո»-ի հետ զրույցում այս մասին ասաց ԱԺ «Իմ քայլը» խմբակցության պատգամավոր Թագուհի Թովմասյանը՝ անդրադառնալով ԱԺ փոխխոսնակ Ալեն Սիմոնյանի օրենսդրական նախաձեռնությանը։

Նշենք, որ ԱԺ փոխխոսնակն առաջարկում է սոցիալական ցանցերում և լրատվամիջոցներում հրապարակված վիրավորանքի և զրպարտության համար փոխհատուցման չափը վիրավորանքի դեպքում 1 մլն դրամից դարձնել 5 մլն դրամ, զրպարտության դեպքում՝ 2 մլն դրամից՝ 10 մլն դրամ։

Թագուհի Թովմասյանը կարծում է՝ այն վիրավորանքի և զրպարտանքի մթնոլորտում, որում այսօր ապրում ենք, այս օրենսդրական փոփոխությունը, գումարի փոփոխությունն ամենևին չի կարող իրավիճակում որևէ բան փոխել. «Կարծում եմ՝ մարդկանց գիտակցության մեջ առավել շատ փոփոխություններ պետք է լինեն, որպեսզի մարդիկ միմյանց մասին խոսելիս ոչ թե անձնական որակումներ տան, այլ փորձեն գործողությունները որևէ կերպ դասակարգել, բայց ոչ երբեք որակումներ վիրավորանքների տեսքով։ Չեմ կարծում, որ իմ գործընկերը հետին նպատակ ունի, ինչ-որ վատ բաներ է մտածում։ Ամեն մեկն այսօր իր ուժերի ներածին չափով փորձում է ներազդել այն իրավիճակի վրա, որը մենք ունենք, որպեսզի Հայաստանում հնարավորինս քիչ լինի վիրավորանքը և զրպարտությունը»,-ասաց պատգամավորը։

Վերջինս չի կարծում, որ օրենսդրական այս նախաձեռնությունը միտում ունի կառավարելու տեղեկատվական հոսքերը, քանի որ որևէ մեկի ձեռքին նոր գործիքակազմ չի ավելանում։ Պատգամավորի խոսքով որևէ բան չի փոխվում. «Եթե օրինակ նախագիծ ներկայացնեն, որ վիրավորանքը և զրպարտությունը քրեականացվի, գուցե մտավախությունս ավելի մեծ լիներ, բայց այն, որ ընդամենը գումարի չափ է փոխվում, չեմ կարծում՝ դա որևէ կերպ կարող է խոսքի ազատությանը վնասել կամ տեղեկատվական հոսքեր կառավարելուն օգնել»,-ասաց պատգամավորը։

Թագուհի Թովմասյանը գտնում է, որ տվյալ դեպքում սա ոչ այնքան արդյունավետ քայլ է, որովհետև գումարի մեծ լինելը զրպարտելու ցանկություն ունեցող որևէ մեկին չի ազատի, որ դա չանի։ Պատգամավորի վստահեցմամբ, եթե մարդը պատրաստ է զրպարտել որևէ մեկին և 1 մլն վճարել, ապա պատրաստ կլինի նաև ավելի շատ վճարել։

Հարցին՝ զրպարտանքի և վիրավորանքի դեմ պայքարում ինչր ավելի արդյունավետ գործիք կարելի էր կիրառել, պատգամավորն ասաց. «Կարծում եմ՝ ուղղակի պետք է դատական նախադեպերը շատ լինեն։ Բոլորս խոսում ենք դատարանի մասին, բայց քիչ մարդ կարող ենք նշել, որ միմյանց նկատմամբ դատական հայցեր են հարուցել և գնացել են դատարան, բողոքարկել են այս կամ այն մարդու արտահայտած կարծիքի համար։ Այսինքն բոլորը դժգոհում են իրարից, բայց հենց պետք է գա դատարանի պահը, որ պետք է գնան դատարանում իրենց իրավունքները պաշտպանեն, չեն անում դա։ Մեկը մտածում է՝ հավես չունի, մյուսը՝ ժամանակ չունի և մենք դատական նախադեպերի պակասի հետևանքով ունենք այս իրավիճակը»,-ասաց Թագուհի Թովմասյանը՝ ընդգծելով, որ եթե մեր դատական նախադեպերը շատ լինեն, ցանկացած քաղաքացի զրպարտելուց և վիրավորելուց առաջ կմտածի, որ վերջնարդյունքում ինքը կանգնելու է դատարանի առջև և որևէ բան գրելուց կամ որևէ բան խոսելուց ավելի ուշադիր կլինի։

Աղբյուր` Փաստինֆո