Փաստ ինֆո

Վերջին ամիսների ընթացքում Հայաստանի կրթական համակարգը փոթորկած առարկայական նոր չափորոշիչների պատմությունը, պարզվում է հեռուն գնացող արմատներ ունի։ Մինչ ոլորտի մասնագետները, խնդրով մտահոգ մարդիկ ու պրոֆեսորադասախոսական կազմը գլուխ կոտրելով փորձում են լուծել թրքական հետքերի ներթափանցումը հայկական հանրակրթական դպրոցների առարկայական չափորոշիչների ծրագիր, թուրքական կողմի համար կանաչ լույս է վառել ԿԳՄՍ նախարարությունը՝ լուծարելով Կրթության ազգային ինստիտուտը, որի հիմնական գործառույթներից էին՝ առարկայական չափորոշիչների մշակումը, դպրոցական դասագրքերի կազմումը, ուսուցիչների վերապատրաստման հարցերը։ Չկա կառույց, չկա վերահսկողություն՝ սա ԿԳՄՍ նախարարության որդեգրած քաղաքականությունն է, որով հիմք է դրվում Հայաստանում կրթական համակարգի քարուքանդը։

Ահա այսպես, մեծ իմաստով անաղմուկ ու առանց ավելորդ գլխացավանքի կառավարությունը «Կրթության ազգային ինստիտուտ» փակ բաժնետիրական ընկերությունը լուծարելու մասին որոշում է կայացնում, որի տակ իր ստորագրությունն է թողնում վարչապետ Նիկոլ Փաշինյանը, ավելի ուշ հաստատելով կրթական չափորոշիչների վերաբերյալ իշխանությունների որդեգրած թրքամետ քաղաքականության արդիականությունը, գործադիրի նիստում բառացիորեն հայտարարելով հետևյալը՝ «Կրթության չափորոշիչների նախագիծը արտահայտում է մեր ռազմավարական պատկերացումները»։

Հանրակրթական դպրոցների համար ծրագրային և դասագրքային չափորոշիչներ մշակող ինստիտուտը լուծարելուց հետո, պարզվում է, համացանցից անհետ կորում է նաև Կրթության ազգային ինստիտուտի պաշտոնական կայք էջը, որտեղ զետեղված էին տարիներ շարունակ մշակված ծրագրեր, չափանիշներ ու չափորոշիչներ, կրթական ուղեցույցներ։ Հանրակրթության ոլորտի կարևոր օղակներից մեկը՝ Կրթության ազգային ինստիտուտը, որ լուծում էր 38 հազարի հասնող ուսուցիչների վերապատրաստման խնդիրը, մշակում մեթոդաբանությունն ու իրականացնում մեթոդական աջակցություն, լուծարվում է գործող կառավարության անհավանական անհեթեթ հիմնավորմամբ, այն է՝ չի կարող լինել ՓԲԸ, այսինքն՝ շահույթ հետապնդող կառույց, որի աշխատակիցների քանակն էլ, ըստ կառավարության հնչեցրած գնահատականի՝ ուռճացված է եղել։

Ինչո՞ւ էր պետք լուծարել Կրթության ազգային ինստիտուտը, փոշիացնել հզոր գիտական, մանկավարժական տարիների փորձով հարուստ կայացած կառույցը։ Հարցի պատասխանը թաքնված է Հայաստանի Հանրապետության և Եվրոպական հանձնաժողովի կողմից տրամադրված դրամաշնորհային միջոցների կառավարիչ հանդիսացող Համաշխարհային բանկի միջև «ԵՄ-ն հանուն նորարարության ծրագրի» դրամաշնորհի ստորագրման առաջարկության տակ, որին օրեր առաջ իր հավանությունն է տվել Հայաստանի Հանրապետության Կառավարությունը՝ ստեղծելու համար Կրթության զարգացման և նորարարության ազգային նոր կենտրոն՝ ձեւավորելու և ներդնելու դասավանդման որակի վրա ազդող նոր մեխանիզմներ։

«Կրթության զարգացման և նորարարության ազգային կենտրոն»-ը, որը ստեղծվելու է լուծարված Կրթության ազգային ինստիտուտի հենքի վրա, պետք է իրականացնի դպրոցների ուսուցիչների վերապատրաստման և մասնագիտական կատարելագործման գործառույթներ, ընդ որում, իրականացնի ուսուցիչների մասնագիտական զարգացման և կատարելագործման գործընթաց, որը ներառելու է գիտելիք, պրակտիկա և ուսուցչից պահանջվող մասնագիտական ներգրավվածություն, ուղեկցվելով միջազգային լավագույն փորձի, շահառուների խորհրդատվությունների, ինչպես նաև նոր չափորոշիչներով սահմանված պահանջների համաձայն:

Բացի այդ, նոր ծրագրի շրջանակներում հստակ կմշակվեն և կսահմանվեն ուսուցիչների վերապատրաստում իրականացնողների հավաստագրման չափանիշները՝ ներդնելով որակի ապահովման հստակ մեխանիզմներ, միաժամանակ հնարավորություն ընձեռելով գնահատել և մշտադիտարկել վերապատրաստման դասընթացների որակը:

Նոր կառույցի ստեղծումը ԿԳՄՍ-ի կողմից հիմնավորվում է նաև այն հանգամանքով, որ ուսուցիչների որակավորման բարձրացման և դասավանդման նորարարական մեթոդների կիրառման խնդիրները հանդիսանում են ՀՀ հանրակրթական համակարգի առաջնահերթություններից մեկը:

Հոդվածը պատրաստելու ընթացքում «Փաստինֆո» լրատվականը կապ հաստատեց մեկ տարի առաջ լուծարված Կրթության ազգային ինստիտուտի նախկին տնօրեն Նորայր Ղուկասյանի հետ։ Զրույցի ընթացքում պարզվեց սակայն՝ պարոն Ղուկասյանը լրագրողների հետ զրուցելու մեծ ցանկություն առանձնապես չունի՝ երկար ժամանակ բացակայել է հանրապետությունից, տեղյակ չէ և չի հետևել հայաստանյան կրթական ոլորտում տեղի ունեցող փոթորկալից զարգացումներին։ Իմանալով նոր ստեղծվելիք «Կրթության զարգացման և նորարարության ազգային կենտրոն»-ի մասին, պարոն Ղուկասյանը նկատեց՝ առաջին անգամ է լսում այդպիսի անունով կառույցի մասին։ Անդրադառնալով նոր չափորոշիչների և այնտեղ թրքական հետքի բացահայտման թեմային, Նորայր Ղուկասյանը կարճ կապեց՝ տեղյակ չէ։ Լրագրողի հարցին՝ վիրավորվա՞ծ է ինքը հեռացել համակարգից, արձագանքեց՝ ոչ այնքան, բայցի այդ, արդեն թոշակի տարիքի մեջ է, այնպես որ՝ ամեն ինչ այնպես է, ինչպես պետք է լիներ...

Հեղինակ՝ Նվարդ Մանվելյան

Աղբյուր` Փաստինֆո