Փաստ ինֆո

«Լույս» խմբակցության ավագանու անդամ Անի Խաչատրյանը ավագանու նիստի ժամանակ հարցրեց, թե կառավարման խորհուրդ ձևավորելու նախագիծն արդյո՞ք վնաս չէ Կենդանաբանական այգուն և արդյո՞ք չի վնասի Երևանի քաղաքապետարանի վարկանիշին: Խնդրեց, որ հարցին պատասխանի ոչ թե նախագծի հեղինակ, «Իմ Քայլը» խմբակցության ավագանու անդամ Արման Անտոնյանը, այլ Տիգրան Վիրաբյանը։ Արման Անտոնյանը ցանկացավ հարցին պատասխանել, սակայն Խաչատրյանը պնդեց՝ ուզում է լսել Վիրաբյանի մեկնաբանությունը։

«Կենդանաբանական այգու կառավարման խորհրդի նախագծի վերաբերյալ մեր դիրքորոշումը հայտնել ենք, չեմ ցանկանում նույն ծավալով ներկայացնել, որովհետև կարծում եմ, որ քննարկման շատ դետալներ վնասում են Կենդանաբանական այգու հետագա վարկանիշին և հասարակության տպավորություններում կթողնեն փոփոխություն»,- ասաց փոխքաղաքապետ Տիգրան Վիրաբյանը։

«Մենք մեր դիրքորոշումը հայտնել ենք` Երևանի քաղաքապետարանը, Կենդանաբանական այգու ղեկավարությունն ասել են, որ հավելյալ գործիքակազմը, որը փորձ է արվում տրամադրել, Կենդանաբանական այգին այս պահին այդ գործիքակազմի անհրաժեշտությունը չունի: Ես կարծում եմ, որ նախագիծը չի օգնելու Կենդանաբանական այգու արդյունավետ կառավարմանը: Այս նախագծով չենք նպաստելու Կենդանաբանական այգու բնականոն աշխատանքին: Այգում դեռ չի ձևավորվել ղեկավար կազմ և երբ մրցույթներ անցկացնելու թույլտվություն լինի, հայտարարվելու է մրցույթը»,- մեկնաբանեց Տիգրան Վիրաբյանը և հավելեց, որ պետք է թույլ տալ, որ այգու աշխատակազմը շարունակի աշխատել, որից հետո կձևավորվի կառավարման խորհուրդ և եթե կառավարման խորհուրդը տեսնի, որ բացթողումներ կան, նոր գործիքակազմ կկիրառվի:

Անի Խաչատրյանը՝ համաձայնվելով Տիգրան Վիրաբյանի մեկնաբանության հետ, դիմեց Արման Անտոնյանին.

«Իմ կարծիքն է, որ դուք Ձեր սեփական գործադիր իշխանության թիկունքին հարվածող հերթական նախագիծն եք բերել»:

Աղբյուր` Փաստինֆո