Փաստ ինֆո

Արմավիրի մարզի Լուսագյուղ համայնքի ղեկավարին բռնություն գործադրելու սպառնալիքով և զենքի գործադրմամբ առևանգելու, ինչպես նաև ապօրինի կերպով զենք պահելու մեջ կասկածվող քաղաքացին ազատ է արձակվել։ Այս մասին «Փաստինֆո»-ն տեղեկացավ պաշտպան Ժորա Համբարձումյանից։ 

Արմավիրի մարզի ընդհանուր իրավասության դատարանը բավարարել է պաշտպանի բողոքը, որով զենքի գործադրմամբ առևանգելու և ապօրինի կերպով զենք պահելու մեջ կասկածվող քաղաքացու ձերբակալումը ճանաչվել է ոչ իրավաչափ։ Նույն որոշմամբ մերժվել է նաև քննիչի միջնորդությունը՝ կալանավորումը որպես խափանման միջոց ընտրելու վերաբերյալ։ Պաշտպանի խոսքով վարույթն իրականացնող մարմինը հիմնավոր կասկածի կապակցությամբ վերացական և ենթադրյալ դատողություններ է արել.

«Հիմնավոր կասկածի տեսանկյունից քրեական գործում եղած նյութերից որևէ կերպ չի երևում և չի հստակեցվում, թե արդյո՞ք առհասարակ Ա.Հարությունյանի գործողություններում առկա է ՀՀ քր. օր-ի 131-րդ հոդ. և 235-րդ հոդ. նախատեսված հանցակազմը: Այսինքն, տվյալ դեպքում, եթե մի պահ անդրադառնանք առևանգման և ապօրինի զենք պահելու բուն իրավական ձևակերպմանը և էությանը՝ համադրելով դրանք քրեական գործի փաստական տվյալների, ապ հստակ երևում է, որ դրանք չեն բխում ՀՀ քր. օր-ի 131-րդ հոդ. և 235-րդ հոդ. դիսպոզիցիայից:Արդյունքում դատարանի կողմից կայացված որոշմամբ պարզ դարձավ, որ բռնություն գործադրելու սպառնալիքով և զենքի գործադրմամբ մարդուն առևանգելու, ինչպես նաև ապօրինի կերպով զենք պահելու մեջ կասկածվողի նկատմամբ կալանավորումը որպես խափանման միջոց ընտրելու վերաբերյալ քննիչի միջնորդությունը մերժվել է նաև հիմնավոր կասկածի բացակայության հիմքով»,-նշեց Ժորա Համբարձումյանը։

Աղբյուր` Փաստինֆո