Փաստ ինֆո

Նոր իշխանություններն իրենց հետ բերում են ոչ միայն նոր արժեհամակարգ, այլև՝ փորձում են փոխարինել ամբողջ այն հերոսական պատմությունը՝ մասնավորապես Ապրիլյան պատերազմի դեպքերը, ցանկանում են, մեղմ ասած, ստվերում պահել այն։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը՝ անդրադառնալով Եռաբլուրում Ապրիլյան պատերազմի հերոսների շիրմաքարերը պղծելու տեղեկատվությանը։

Նա պատահական չի համարում, որ սա արվել է «Մարտի 1»-ի զոհերի հիշատակին հուշարձան կառուցելու համար գումար հատկացնելուց հետո եւ համոզված է, որ երևույթներին պետք է նայել ոչ թե հատվածական, այլ՝ ընդհանուր համատեքստում, ամբողջականության մեջ։
«Այս ամբողջականության մեջ պարզ երևում է, որ կիրառվում է այն տեխնոլոգիան, որ սկզբից ուղղակի պղտորում են, ստվեր գցում անվան վրա և դա արվում է սիստեմատիկորեն։ Հերոսացվում են չհաջողված պետական հեղաշրջման փորձում մասնակցած, շատերի կարծիքով՝ անմեղ զոհված անձինք։ Անհամաչափորեն փոխարինվում են ոչ համեմատելի դեպքերը։ Կարծում եմ՝ և՛ այն 30 մլնը, և՛ զոհերի հուշարձանն, ի վերջո, խոսում է այն իրական մեղքի մասին, որը կրում են հենց Նիկոլ Փաշինյանը և նրա՝ այդ ժամանակվա զինակիցները»,- ասաց Ալավերդյանը՝ նշելով, որ որևէ գումար չի փոխարինի զոհված անձին։ Միաժամանակ տիկին Ալավերդյանը նկատեց, որ խոսքը գնում է այն մասին, որ ներքուստ Նիկոլ Փաշինյանը և նրա զինակիցները մեղքի բաժինը զգում են իրենց վրա և այժմ արվում է ամեն ինչ՝ իրենց մեղքը դրանով փակելու համար։

Ալավերդյանը կարևորեց, որ այդ ամենով արդարացվում է ՀՀ առաջին նախագահի անունը, պատկերը, գործողությունները ՝ լինի դա իր նախագահության ժամանակ, լինի՝ տապալված իշխանության զավթման փորձի։

«Դրանք հերոսացնում են։ Ոչ միայն վերականգնում են, այլև՝ հերոսացնում են առաջին նախագահի կերպարը և դա արվում է երկրորդ նախագահի անվան հետ անարժան ձևով խաղալով։ Կարծես թե փորձում են ամենը, ինչ կապված է այդ անձի և Արցախյան ազատամարտի հետ, ուղղակի սևացնել։ Երրորդ նախագահի վերաբերյալ չգիտես, թե ինչ ծրագրեր ունեն և ահա այդ շարքում փորձում են հերոսացնել առաջին նախագահին։ Մարտի 1-ը եղել է ոչ այլ ինչ, քան իշխանության զավթման չհաջողված փորձ և այստեղ դնել պետական մակարդակով դնել այդպիսի հուշարձաններ երկու բան է նշանակում՝ ամբողջովին արդարացումն այդ զավթման փորձի և այդ զոհերի առջև մեղքի զգացումն է, մեղքը, որի կրողը հենց այսօրվա իշխանության կարկառուն դեմքերն են »,- նշեց Ալավերդյանը։

Նրա խոսքով՝ Ադրբեջանի կողմից կատարված ռազմական, մարդկության, մարդասիրության դեմ ուղղված հանցագործությունները դատապարտելու փոխարեն ցեխ են շպրտում Արցախի պատերազմը հաղթող անձանց անվան վրա և փորձ արվում այդ դեպքերն ամբողջովին ներկայացնում որպես տապալված գործողություններ։ Մինչդեռ, ինչպես նշեց բանախոսը, Ադրբեջանը բավականին պարզ է հայտնում իր նպատակների մասին, ուստի՝ կիսատ-պռատ արտահայտվել պետք չէ։

Տիկին Ալավերդյանի կարծիքով՝ ադրբեջանական կողմի նպատակը պարզից էլ պարզ է, այն է՝ ամբողջովին դուրս մղել հայությունը Արցախի Հանրապետությունից և իրենց չպատկանող տարածքները կրկին բռնի կերպով կցել այսօրվա Ադրբեջանին։ «Սա է եղել նպատակը, որը տապալվել է»,- ասաց Ալավերդյանը՝ նշելով, որ ռազմական և քաղաքական տեսակետից ողջամիտ չէ ներկայացնել, թե իբրև մենք տանուլ ենք տվել և Ադրբեջանը հաղթել է։ Այս առումով նա բարձր գնահատեց ՊՆ նախարարի պատասխանը, որով նա հայտարարել էր, որ մենք հաղթանակ ենք տարել։

Ավելի վաղ հայտնել ենք, որ համացանցում տեղեկություն էր տարածվել, թե Ապրիլյան պատերազմի հերոսներ Արմենակ Ուրֆանյանի և Ռոբերտ Աբաջյանի շիրիմները պղծվել են։ Ահազանգի հետքերով ոստիկանությունը դեպքի վայր է մեկնել, նյութեր են նախապատրաստվում։

Հեղինակ՝ Իզաբել Սահակյան

Աղբյուր` Փաստինֆո