Փաստ ինֆո

Ալկոհոլային խմիչքից զանգվածային թունավորման գործով մեղադրյալ Աշոտ Հովսեփյանի մոտ կորոնավիրուս է հայտնաբերվել, նրա  թեստի պատասխանը դրական է եղել։ Այս մասին «Փաստինֆո»-ի հետ զրույցում ասաց պաշտպան Գոռ Գևորգյանը։

Ինչպես արդեն տեղեկացրել ենք՝ Աշոտ Հովսեփյանին կալանավորելու մասին միջնորդություն է ներկայացվել դատարան, որի քննությունը հետաձգվել է՝ մեղադրյալի ինքնազգացողության կտրուկ վատթարացման պատճառով։ Նրան շտապօգնությամբ տեղափոխել են հիվանդանոց։

Պաշտպան Գոռ Գևորգյանը «Փաստինֆո»-ի հետ զրույցում ասաց, որ Աշոտ Հովսեփյանին տեղափոխել են Սուրբ Գրիգոր Լուսավորիչ ԲԿ, որտեղ ամբողջական  հետազոտություն է անցել, ինչի արդյունքում  պարզվել է, որ Հովսեփյանի մոտ առկա է միակողմանի թոքաբորբ։

«Երկրորդ անգամ են թեստավորել և ամենայն հավանականությամբ՝ թեստավորել են քննչականի կասկածանքի կամ պարտադրանքի ներքո, քանի որ ինձ մոտ տպավորություն է ստեղծվել, որ Քննչականն ունի անհիմն և հանցավոր կասկած, որ կորոնավիրուսի թեստի արդյունքները եղել են միջամտության արդյունքում։ Ես իրենց պահվածքից այդպես հասկացա »,- ասաց փաստաբանը։

Ալկոհոլային խմիչքից զանգվածային թունավորման գործով մեղադրյալի առողջական վիճակը վատացել է. կալանավորելու միջնորդության քննարկումը հետաձգվել է

Վերջինս տեղեկացրեց, որ դեռևս չի թեստավորվել, իսկ որպես կոնտակտավոր կթեստավորվի այն ժամանակ, երբ որպես կոնտակտավոր կթեստավորվեն՝ ՀՀ ոստիկանության Արմավիրի բաժանմունքի, դատարանի ամբողջ անձնակազմը։

Ինչ վերաբերում է կալանավորման մասին միջնորդությանը, ինչն անհապաղ քննարկման ենթակա է, պաշտպանը նշեց, որ դատավարական կարգով որևէ ընթացակարգ չկա, իրավիճակը ֆորսմաժորային է և դատավորն ինքը պետք է որոշի ինչ որոշում կայացնի։

«Մի բան կարող եմ ասել՝ ինչ էլ որոշի, դատավարական առումով չի կարող առանց պաշտպանյալիս ներկայության անցնի բուն հարցի քննարկմանը»,- ասաց Գևորգյանը՝ նշելով, որ այս պայմաններում ամենատրամաբանական որոշումը կլինի ներկայացված կալանքի միջնորդությունը հետ վերցնելը և արդեն վարույթն իրականացնող մարմնի կողմից Հովսեփյանի նկատմամբ խափանման միջոց ընտրելը։

Այդուհանդերձ, պաշտպանը հայտնեց, որ Հովսեփյանին կալանավորելու մասին միջնորդության վերաբերյալ դատական նիստը նշանակվել է այսօր։ Դատական նիստին Հովսեփյանը չի մասնակցի։

Նշենք, որ օգոստոսի 31-ից սեպտեմբերի 5-ն ընկած ժամանակահատվածում գրանցվել է ալկոհոլային թունավորման 46 դեպք՝ Արմավիրում, Կոտայքում, Երեւանում, որից 17-ը՝ մահվան ելքով:

Աշոտ Հովսեփյանը գնել է գործարանային սպիրտ, խառնել ջուր, շաքարավազ և կիտրոնի աղ. «մահացու ալկոհոլի» հետքերով

Դեպքի առթիվ ՀՀ քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 279-րդ հոդվածի (անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը) 3-րդ մասի հատկանիշներով: Հովսեփյանին մեղադրանք է առաջադրվել ՀՀ քրեական օրենսգրքի 207-րդ հոդվածի 2-րդ մասով՝ կեղծ օղի արտադրելու կամ իրացնելու համար, որն անզգուշությամբ առաջացրել է մարդու մահ կամ ծանր հետևանքներ։

Հեղինակ՝ Իզաբել Սահակյան

Աղբյուր` Փաստինֆո