Փաստ ինֆո

Վրաստանում կարողացել են վերահսկողության տակ պահել կորոնավիրուսի տարածումը, ուստի առնվազն մինչև հոկտեմբերի 31-ը՝ խորհրդարանական ընտրությունները, չեն բացի պետական ցամաքային սահմանները։ «Փաստինֆո»-ի հետ զրույցում այս մասին ասաց վրացագետ Ջոնի Մելիքյանը՝ անդրադառնալով հայ-վրացական սահմանի հնարավոր բացմանը։

Վերջինս նշեց, որ կարանտինային ռեժիմ կլինի մեզ մոտ, իսկ Ադրբեջանում արդեն կարանտին է, Թուրքիայում էլ համաճարակային իրավիճակը բարդ է, հետևաբար մինչև նոյեմբերի սկիզբ ոչինչ չի փոխվելու. «Վրաստանում էլ թվերն ավելացել են և որոշ վայրերում համաճարակային իրավիճակը փոխվում է։ Օրինակ՝ Աջարիայում հիմա մի քիչ բարդ է իրավիճակը և այս ամենը ևս կարող է ազդել։ Եթե Վրաստանում իրավիճակը բարդանա, նշանակում է՝ նույն քաղաքականությունը կշարունակվի մինչև տարեվերջ»,-ասաց վրացագետը՝ ընդգծելով, որ ցամաքային սահմանը մինչև հոկտեմբերի վերջ չի բացվի, իսկ դրանից հետո ոչ միայն հարևան երկրների վիճակը նկատի կառնվի, այլև իրենց։ Ջոնի Մելիքյանը կարծում է, որ Վրաստանի վարչապետի՝ կորոնավիրուսի դեմ պայքարը բարձրացրեց իշխող թիմի վարկանիշը, հետևաբար նրանք կփորձեն մինչև ընտրություններ պահել այդ ձեռքբերումը։

Հարցին՝ եթե Վրաստանում իրավիճակը չվատանա, հնարավո՞ր է ընտրություններից հետո վերանայեն հարևան երկրների հետ սահմանները բացելու հարցը, վրացագետը նկատեց՝ եվրոպական որոշ երկրների հետ կապված Վրաստանը բավականին հեշտացրել է գործընթացները, բայց այս ամենը փոփոխվող է. «Իսրայելի հետ պատրաստվում էին վերականգնել տեղափոխությունները և չվերթները, այցելությունները թույլատրեին, բայց վերջին պահին Իսրայելում իրավիճակը փոխվեց, վատացավ և այդ գործընթացը դադարեց։ Դրա համար կարևոր է, որ երկու կողմն էլ ունենան կայուն իրավիճակ։ Եթե մեզ մոտ իրավիճակը կտրուկ լավանա, փոխվի, միգուցե քննարկվի, բայց այսօրվա միտումներով թե՛ այնտեղ, թե՛ այստեղ միգուցե մինչև տարեվերջ ստիպված լինենք պահել ցամաքային փակ սահմանը»,-ասաց վրացագետը։

Հիշեցնենք, որ ԼՀԿ խմբակցության ղեկավար Էդմոն Մարուքյանը երեկ հայտարարել էր, որ Ռուսաստանին հաջողվեց Վրաստանի հետ սառը հարաբերություններ ունենալով հանդերձ քննարկել ու համաձայնության գալ՝ Լարսի հարցի շուրջ, իսկ Հայաստանը՝ ոչ, թեեւ եղբայրական պետություններ են համարվում։ Ավելին՝ Էդ.Մարուքյանը կարծիք էր հայտնել, որ եթե Հայաստանը բարձր մակարդակով բանակցի, ապա կկարողանա լուծման հասնել, ինչից հետո Ռուսաստան մեկնել ցանկացող քաղաքացիների հետ հանդիպել էր ԱԺ փոխխոսնակ Ալեն Սիմոնյանը ու հայտարարել, որ ՌԴ ուղևորափոխադրում չի լինելու։ Ալեն Սիմոնյանը նշել էր, որ մեկ ամսվա ընթացքում ռուսների հետ կբանակցեն, իսկ վրացիների հետ չեն կարողանալու։ «Ով ինչ խոստում տա՝ մի հավատացեք»,- ասել էր նա։

Հեղինակ՝ Հասմիկ Կոշկարյան

Աղբյուր` Փաստինֆո