Փաստ ինֆո

Սեպտեմբերի 12-ից հետո Հայաստանի Հանրապետությունում կառավարության կողմից հայտարարվելու՞ է կարանտին։ Կարո՞ղ է դա լինել այնպիսի ուղերձ, որ ավելի վատն է, քան արտակարգ դրությունը և որի պատճառով Հայաստանի սահմանները շարունակաբար փակ մնան քաղաքացիների ելքի համար։ Այս մասին այսօր ԱԺ արտահերթ նիստում ասաց «Լուսավոր Հայաստան» խմբակցության ղեկավար Էդմոն Մարուքյանը` դիմելով Արդարադատության փոխնախարար Ռաֆիկ Գրիգորյանին։

Փոխնախարարը նշեց, որ օրենսդրական փաթեթը նախաձեռնելու նպատակն այնպիսի գործիքակազմ ապահովելն է, որն առանց արտակարգ դրության իրավական ռեժիմի հնարավոր է պայքարել համավարակի դեմ. «Եթե օրենսդրական փաթեթն ընդունվի և ուժի մեջ մտնի մինչև սեպտեմբերի 11-ը, ապա կառավարությունը մտադիր է կարանտին հայտարարել և համաճարակի դեմ պայքարը շարունակել, քանի որ այն ավարտված չէ։ Այս օրենսդրական փաթեթը նախատեսում է իրավունքների սահմանափակումների, միջոցառումների կիրառման այնպիսի սահմանափակ հնարավորություն, որը երբեք հնարավոր չի շփոթել արտակարգ դրության հետ։ Որոշակի կետերում կան հնարավորություններ անվտանգության կանոններն ապահովել, բայց արտակարգ դրության գործիքակազմը շատ ավելի լայն է»,-ասաց փոխնախարարը։

Էդմոն Մարուքյանն արձագանքեց. «Կառավարությունը սեպտեմբերի 12-ին որոշում է կայացնում ՀՀ տարածքում հայտարարել կարանտին։ Մի հատ թարգմանեք դա ռուսերեն, անգլերեն ու մի հատ նայեք, տեսեք էդ ուղերձից հետո հնարավոր է ՀՀ քաղաքացիներին թույլ տան դուրս գալ էս երկրից։ Ոնց ենք բացատրելու, որ սա ավելի մեղմ ռեժիմ է և վիճակը լավացել է»,-ասաց Էդմոն Մարուքյանը։

Աղբյուր` Փաստինֆո